Prezıdent atynan Sársenǵalı Ábdimanapov pen Ermek Jangeldınge memlekettik nagradalar tabystaldy
ASTANA. KAZINFORM - Mádenıet jáne óner qyzmetkerleri kúnine oraı joǵary bilim salasynyń sarapshysy Sársenǵalı Ábdimanapov pen «Art-Samal» kórkem galereıasynyń úılestirýshisi Ermek Jangeldın memlekettik nagradalarmen marapattaldy, dep habarlaıdy QR mádenıet jáne aqparat mınıstrliginiń baspasóz qyzmeti.
Qazaqstan Respýblıkasy Prezıdentiniń Jarlyǵymen Sársenǵalı Ábdimanapovqa «Parasat», Ermek Jangeldınge «Qurmet» ordeni berildi. Búgin memlekettik nagrada ıelerin QR Mádenıet jáne aqparat vıtse-mınıstri Aıbek Sydyqov quttyqtady.
Ol Sársenǵalı Ábdimanapovtyń bilim berý salasyn damytýǵa, eldiń ıntellektýaldyq áleýetin arttyrýǵa qosqan eleýli úlesin, sondaı-aq Ermek Jangeldınniń ónerdi qoldaý jáne nasıhattaý baǵytyndaǵy eńbegin atap ótti.
Óz kezeginde Sársenǵalı Ábdimanapov pen Ermek Jangeldın eńbekterine berilgen joǵary baǵa jáne mádenıet, óner men bilim salasy ókilderine kórsetilip kele jatqan turaqty qoldaý úshin Memleket basshysyna alǵys bildirdi.
Parasat» ordeni ǵylymdy, mádenıetti, ádebıet pen ónerdi damytýǵa sińirgen eleýli eńbegi, sondaı-aq eldiń rýhanı jáne ıntellektýaldyq áleýetin nyǵaıtýǵa qosqan úlesi úshin beriledi. Al «Qurmet» ordeni ekonomıka, áleýmettik sala, ǵylym, mádenıet pen bilim berýdi damytýdaǵy eńbegi, memlekettik organdardaǵy úlgili qyzmeti jáne belsendi qoǵamdyq qyzmeti úshin tabystalady.
Aıta keteıik, jeke jaǵdaılaryna baılanysty marapat ıeleri buǵan deıin Mádenıet jáne óner qyzmetkerleri kúnine arnalǵan saltanatty rásimge qatysa almaǵan bolatyn.
Aıta keteıik, jaqyndla Qazaqstan Respýblıkasyna sińirgen aıryqsha eńbegi úshin bir top azamatqa memlekettik nagrada tabystaldy.
