Prezıdent atynan mádenıet jáne aqparat salasynyń ókilderine memlekettik nagradalar tabystaldy
ASTANA. KAZINFORM — Respýblıka kúni qarsańynda Astanada mádenıet jáne aqparat salasy qyzmetkerlerin marapattaý rásimi ótti.
Mádenıet jáne aqparat mınıstri Arman Qyryqbaev Memleket basshysynyń atynan otandyq mádenıet, óner, ádebıet jáne medıa salasynyń damýyna eleýli úles qosqan 62 azamatqa memlekettik nagradalar tabystady.
Saltanatty rásimde mınıstr marapat ıelerin quttyqtap, mádenıet pen ónerdiń qoǵamnyń rýhanı tutastyǵyn bekemdeýdegi mańyzyn aıryqsha atap ótti.
– Memleket basshysy Qasym-Jomart Toqaev mádenıet pen ónerdi damytý, tarıhı murany saqtaý jáne sapaly aqparat keńistigin qalyptastyrýdyń mańyzyn udaıy aıtyp keledi. Sebebi, bul – qoǵamnyń rýhanı damýy men el bolashaǵyna qyzmet etetin ortaq mindetter, – dedi Arman Qyryqbaev.
Marapattalǵandar qatarynda «Astana Opera» memlekettik opera jáne balet teatrynyń, Kúlásh Baıseıitova atyndaǵy Qazaq ulttyq óner ýnıversıtetiniń, Erkeǵalı Rahmadıev atyndaǵy Memlekettik akademııalyq fılarmonııanyń, Roza Baǵlanova atyndaǵy «Qazaqkontsert» memlekettik akademııalyq kontserttik uıymynyń, Qurmanǵazy atyndaǵy Qazaq ulttyq konservatorııasynyń jáne ózge de mádenıet pen óner mekemeleriniń ókilderi bar.
Sondaı-aq «Qazaqstan» telearnasynyń, «Habar» agenttiginiń qyzmetkerleri jáne ardagerleri, «Balapan», «Abai TV», «Astana» telearnalarynyń, «Kazahstanskaıa pravda» respýblıkalyq gazetiniń, QR Ulttyq kitaphanasy men QR Ulttyq mýzeıiniń ókilderi memlekettik nagradalarǵa ıe boldy.
Rásim sońynda mınıstr marapat ıelerin Respýblıka kúnimen quttyqtady. Arman Qyryqbaev ulttyq merekeniń el egemendigin aıshyqtap, halyq birligin nyǵaıtýdaǵy mańyzyna toqtaldy. Sondaı-aq sala mamandaryna kóp jylǵy adal eńbegi úshin alǵys aıtyp, zor densaýlyq, baq-bereke, shyǵarmashylyq shabyt pen kásibı tabys tiledi.
Memleket basshysy Qasym-Jomart Toqaev Respýblıka kúnine arnalǵan saltanatty jıynda sóılegen sózinde Respýblıka kúni – kúlli halqymyzdyń basyn qosatyn, jalpyulttyq sıpaty bar biregeı mereke ekenine toqtaldy.
