Prezıdent: Astanada jańa áýejaı salý — kezek kúttirmeıtin mindet
ASTANA. KAZINFORM — Ortalyq Azııa aımaǵynda kólik-logıstıka salasyndaǵy báseke kúsheıip keledi. Memleket basshysy Qasym-Jomart Toqaev Parlament palatalarynyń sońǵy birlesken otyrysynda temirjol, avtokólik jáne áýe logıstıkasyn arttyrýdy, Astanaǵa jańa áýejaı salýdy tezdetýdi tapsyrdy.
Prezıdent elimizdiń ınfraqurylymdyq arqaýynyń taǵy bir myzǵymas tiregi — kólik-logıstıka salasyna basa nazar aýdarý keregin aıtty. Bul sala strategııalyq mańyzǵa ıe.
— Bizdiń aımaqtaǵy barlyq elder de osy baǵytqa den qoıyp jatyr, sondyqtan, báseke kúsheıýde. Temirjol salasynyń júk tasymalyndaǵy rólin eskere otyryp, memleket jańa magıstraldar men vokzaldar salýǵa jáne olardy jańǵyrtýǵa basa mán berip otyr, — dep atap ótti Prezıdent.
Byltyr Dostyq — Moıynty baǵytynyń ekinshi jelisi jáne Almaty qalasyn aınalyp ótetin temirjol iske qosyldy. Al bıyl Moıynty — Qyzyljar jáne Darbaza — Maqtaaral, kelesi jyly Baqty — Aıagóz temirjoldarynyń qurylysy aıaqtalady.
— Elimizdegi avtokólik joldarynyń sapasyn jaqsartý mindetin de oryndaýymyz kerek. Byltyr 13 myń shaqyrym avtokólik jolyn jóndeý jumysy bastaldy. Onyń 6 myń shaqyrymy qoldanysqa berildi. Mundaı aýqymdy jumys el tarıhynda birinshi ret jasaldy. Kelesi jyly avtokólikterdi ótkizý beketterin jańǵyrtý isi aıaqtalýy kerek. Sońǵy bes jylda el aýmaǵy arqyly avtokólikpen tasymaldanatyn júk kólemi eki ese artyp, 6 mıllıon tonnaǵa jetti. Byltyr avtokólikpen júk tasymaldaýshylardyń tabysy 1,5 trıllıon teńge boldy. Bul — temirjol salasyndaǵy kirispen shamalas kórsetkish. Osynyń ózi otandyq avtokólik tasymaly salasynyń áleýeti zor ekenin kórsetedi. Demek, mundaı kásipkerlerdi barynsha qoldaý kerek, — dedi Q. Toqaev.
Avıatsııa salasyndaǵy tabysymyz da kóbeıýde. Elimizde jańa ushý baǵyttary ashylyp jatyr. Tolyqqandy áýe habtaryn qalyptastyrý úshin naqty jumys júrgizilip keledi.
— Árıne, osy turǵydan alǵanda, Astana qalasynda jańa áýejaı salý — kezek kúttirmeıtin mindet. Kóp uzamaı onyń qurylysy bastalýy qajet. Áýe keńistigi arqyly júk tasymaldaıtyn arnaıy kompanııa qurý óte oryndy sheshim boldy dep sanaımyn. Bul mańyzdy qadam halyqaralyq logıstıkadaǵy áleýetimizdi kúsheıtýge yqpal eteri sózsiz, — dedi Memleket basshysy.
Buǵan deıin Prezıdent Quryltaı saılaýyn ótkizý týraly arnaıy Jarlyqqa qol qoıatynyn, onyń quramyna úzdikter ǵana kirýi keregin aıtqan edi.
30 jylda Parlament 3,5 myńǵa jýyq zań qabyldaǵan.
Sondaı-aq, Elektrondyq Parlamentti damytýǵa basymdyq beriledi.
