Prezıdent Astanada páterdi jalǵa berý bıznesin retteýdi tapsyrdy
ASTANA. QazAqparat - EKSPO kórmesine daıyndyq jumystaryn pysyqtaýǵa arnalǵan jıynda QR Prezıdenti Nursultan Nazarbaev Astanada arendalyq baspananyń kóleńkeli naryǵymen kúresýdi tapsyrdy, dep habarlaıdy QazAqparat.
«Astanada baspanany jalǵa berýdiń kóleńkeli naryǵy ulǵaıyp keledi. Qala basshylyǵy jalǵa berilgen úılerdiń naqty sanyn bilmeıdi. Kóbisi birneshe páterden satyp alǵan, ony jalǵa berip, kiris kózin jasap alǵan. Bul bıznestiń bir túri, biraq qala bıýdjetine mundaı bıznesten salyq túsip otyrǵan joq. Qalanyń salyq qyzmeti ne qarap otyr? Bul salany tártipke keltirý qajet», - dep atap ótti Memleket basshysy.
Sondaı-aq Elbasy memlekettik turǵyn úı qorynan páter ala alatyn azamattar sanatyn qysqartý qajettigin aıtty.
«Men bul týraly birneshe márte aıttym. Biz soǵys ardagerlerin on ese pátermen qamtydyq: balalaryn, nemerelerin, tipti shóberelerine sheıin. Qurmet bolý kerek. Biz olardy qurmetteımiz, syılaımyz, barlyǵyn jasap jatyrmyz, biraq oń-solyna qaraý kerek. Tegin baspana degen bolmaý kerek. Kezekte turǵandardyń basym bóligi bıýdjettik qyzmetkerler. Olar Turǵyn úı qurylys jınaǵy júıesi arqyly nemese otandyq nesıelerdi sýbsıdııalaý tetikterin qoldanýy tıis. Onyń barlyǵy «Nurly jer» baǵdarlamasynda qamtylǵan», - dep túsindirdi Nazarbaev.
