Prezıdent Astanada qıyrshyq tasty zańsyz óndirýdi doǵarýdy talap etti
ASTANA. QazAqparat - Elbasy Nursultan Nazarbaev elorda shekarasyndaǵy aýmaqtan qum men qıyrshyq tasty zańsyz óndirýdi doǵarýdy tapsyrdy, dep habarlaıdy QazAqparat.
«Qala aýmaǵynda qum men qıyrshyq tasty zańsyz óndirýdiń faktileri bar. Áset (Astana ákimi Isekeshev), osyǵan nazar aýdar. Olar kimder?»,-dedi Prezıdent «EKSPO-2017» kórmesine daıyndyq barysyna jáne Astanany damytýǵa arnalǵan keńeste.
Óz kezeginde Á. Isekeshev bul karerler qala shekarasynan tys aýmaqta bolǵanyn, al elordany keńeıtý kezinde shaharǵa jaqyndaı túskenin jetkizdi.
Memleket basshysy bul baǵyttaǵy tártipti baqylap otyrý qajettigin qadap aıtty. 3 jylda Astanada qum men qıyrshyq tasty óndirýdiń 14 zańsyz faktisi anyqtalǵan. Bundaı jaǵdaılar qalanyń kórinisin buzyp, uqypsyzdyqty baıqatady.
Osy oraıda N. Nazarbaev Astana ákimine Aqmola oblysynyń ákimimen birlese otyryp, mundaı faktilerdiń aldyn alýǵa baılanysty tıisti sharalar qabyldaýdy júktedi.
