Prezıdent Astana Team jas hokkeıshilerin jeńisimen quttyqtady
ASTANA. KAZINFORM — Prezıdent Qasym-Jomart Toqaev Astana Team balalar hokkeı komandasyn Kanadada ótken Quebec International Pee-Wee Hockey Tournament halyqaralyq jarysynda jeńiske jetýimen quttyqtady. Bul týraly QR Prezıdentiniń keńesshisi – baspasóz hatshysy Aıbek Smadııarov habarlady.
Onyń sózinshe, Memleket basshysy qazaqstandyq klýbtyń sensatsııalyq jetistigi otandyq sporttaǵy aıtýly ýaqıǵa ekenin atap ótti.
— Qasym-Jomart Toqaev joǵary sheberlik deńgeıi men jeńiske degen ynta-jigerin pash etip, aqtyq synda hokkeıdiń otany sanalatyn kanadalyqtardan basym túsken órenderimizge rızashylyǵyn jetkizdi. Prezıdent jas hokkeıshilerdiń tabandy túrde jattyǵyp, kúsh-qaırattaryn shyńdap, budan da bıik asýlardy baǵyndyrýyna tilektestik bildirdi, — dep jazdy ol Telegram-arnasynda.
Budan buryn Prezıdent Japonııa Imperatorynyń týǵan kúnine oraı quttyqtaý jedelhatyn joldaǵanyn jazǵan bolatynbyz.