Prezıdent Astana LRT jumysyn iske qosty
Prezıdent Qasym-Jomart Toqaev elordadaǵy qoǵamdyq kólikke, sonyń ishinde LRT júıesine monıtorıng júrgizip, jumysyn retteıtin Biryńǵaı dıspetcherlik ortalyqtyń qyzmetimen tanysty, dep habarlaıdy Aqorda.
Astana ákimi Jeńis Qasymbektiń aıtýynsha, LRT júıesin iske qosý aıasynda jeńil relsti kóliktiń arnaýly dıspetcherlik qyzmeti jasaqtalǵan.
Qaladaǵy qoǵamdyq kólikke monıtorıng júrgizý jáne onyń qyzmetin retteýmen 21 maman aınalysady.
LRT júıesiniń ár quramy 600-den astam jolaýshy tasymaldaýǵa arnalǵan. Uzyndyǵy 22,4 shaqyrym bolatyn jeli arqyly 15 quram júrgizýshisiz júredi (4 quram rezervte).
Basqarý, jyldamdyqty arttyrý jáne tejeý, esikti ashý úderisteri, sondaı-aq tótenshe jaǵdaı kezindegi áreketter tolyǵymen avtomattandyrylǵan. Qosymsha baqylaý úshin qolmen basqarý jáne dıspetchermen baılanysqa shyǵý múmkindigi qarastyrylǵan.
LRT ınfraqurylymynda 18 stantsııa men zamanaýı depo bar. Baǵyt boıynsha joldyń uzaqtyǵy shamamen 40 mınýtty quraıdy. Quramdar saǵatyna 50-60 shaqyrym ortasha jyldamdyqpen 5-6 mınýt saıyn júredi.
Memleket basshysy jeńil relsti kóliktiń paıdalanýǵa berilýi Astana men elimiz úshin erekshe mańyzdy oqıǵa ekenin atap ótti.
Qasym-Jomart Toqaev elorda keleshekte Eýrazııanyń kólik habyna aınalýǵa tıis ekenin aıtty.
Qasym-Jomart Toqaevqa 001 serııaly karta berildi.
Memleket basshysy LRT júıesiniń alǵashqy jolaýshysy retinde «Áýejaı» stantsııasynan «Ulttyq mýzeı» stantsııasyna deıin júrdi.
Aıta keteıik, buǵan deıin Astanadaǵy júrgizýshisiz LRT poıyzdary qalaı jumys isteıtini habarlandy.
