Prezıdent Astana qalasynyń ákimi Jeńis Qasymbekti qabyldady
ASTANA. KAZINFORM – Memleket basshysy Qasym-Jomart Toqaev Astana qalasynyń ákimi Jeńis Qasymbekti qabyldady. Bul týraly Aqordanyń baspasóz qyzmeti habarlady.
Qasym-Jomart Toqaevqa elordanyń bıylǵy birinshi jartyjyldyqtaǵy áleýmettik-ekonomıkalyq jáne ınfraqurylymdyq damýy jóninde málimet berildi.
Jeńis Qasymbektiń aıtýynsha, qaladaǵy barlyq negizgi ekonomıkalyq kórsetkishter boıynsha oń dınamıka baıqalady. Investıtsııa kólemi 632 mıllıard teńgeden asty. Bul ótken jyldyń osy kezeńimen salystyrǵanda 13,2 paıyzǵa artyq. Óńdeý ónerkásibi, medıtsına, bilim, kólik jáne logıstıka salalaryndaǵy jobalar belsendi túrde júzege asyrylyp jatyr.
Prezıdentke mektep, qoljetimdi baspana, medıtsınalyq ortalyqtar qurylysy, apatty jaǵdaıdaǵy eski úılerdi buzý, turǵyn úı alaptaryn damytý, qalany abattandyrý jáne kógaldandyrý máseleleri jóninde baıandaldy. Bıyl 20-dan astam mektep pen 4 500 oryndyq 6 stýdenttik jataqhana salynady. Budan bólek elordada 170 aýla men qoǵamdyq oryn, atap aıtqanda saıabaqtar, gúlzarlar, jelekjoldar abattandyrylyp, 70-ke jýyq kóshe jóndeledi.
Astana ákimi qurylysy uzaqqa sozylǵan turǵyn úı keshenderi boıynsha atqarylyp jatqan júıeli jumystar týraly aıtty. 16 myńnan astam úlesker-otbasynyń 15,5 myńy baspanaly boldy. Qalǵan úleskerler páterlerine osy jyldyń sońyna deıin qonystanady.
Qasym-Jomart Toqaevqa jylytý maýsymyna daıyndyq jóninde baıandaldy. Bıyl «Telman» gaz jylý stantsııasynyń birinshi kezegin, «Turan» gaz jylý stantsııasynyń ekinshi kezegin, sondaı-aq 3-shi JEO-nyń kómirmen jumys isteıtin bóligin iske qosý josparlanyp otyr.
Kezdesý sońynda Qasym-Jomart Toqaev elordany áleýmettik-ekonomıkalyq turǵydan damytý, shahardy abattandyrý, sondaı-aq V Dúnıejúzilik kóshpendiler oıyndaryna daıyndyqty pysyqtaý jóninde birqatar mindet júktedi.
