Prezıdent Astana Hub jumysyn jeke baqylaýynda ustamaq
Kórshiles alpaýyt elder ІT-startaptar salasynda ilgeri jyljyp bara jatqanyna toqtalǵan Elbasy «Atap aıtqanda, bul baǵytta elimiz qalyp qalmaýy kerek. Búgingi tanystyrylym barysynda atalyp ótken málimetter adamdy jigerlendiredi. Sondyqtan osy jumystardy baqylaýda ustaıtyn bolamyn. Ótken jyly biz 100 jańa esimge engen adamdardy qarsy alǵan bolatynbyz, búginde olardyń arasynda óz armanyn júzege asyrǵandar da bar. Bıyl úlken jetistikterge qol jetkizgen Qazaqstannyń 100 nemese 200 jańa esimin anyqtaıtyn bolamyz», - dedi.
Sonymen qatar QR Prezıdenti jańa tehnologııalar salasynda eńbek etip júrgen jastarǵa tabys tiledi.
«Bul saladaǵy mamandardyń barlyǵy jastar. Qazaqstannyń jarty halqy 30-ǵa tolmaǵan jastar. Bolashaq sizderdiń qoldaryńyzda. Búgingi básekeles zamanda bizdiń elimiz óz Táýelsizdigin saqtap, aldyńǵy qatarly damyǵan 30 eldiń qatarynda bolýy úshin sizder jaqsylap jumys isteýlerińiz kerek. Tek eńbekpen, bilimmen ǵana osy maqsatqa jetemiz. Sondyqtan bilim berý men ǵylym salasyna jyldan jylǵa qarajatty bólý kólemi artatyn bolady», - dedi Memleket basshysy.
Budan buryn habarlanǵandaı, Elbasy Nursultan Nazarbaevtyń qatysýymen «Astana Hub» halyqaralyq ІT-startaptar tehnoparkiniń jumysyn resmı iske qosý sharasy ótti.
Saltanatty shara barasynda Prezıdent 2019 jyldyń 1 qańtarynan Qazaqstanda jańa ІT-ýnıversıtet jumys isteıtinin málim etti.
Aıta keteıik, Astana Hub mıssııasy - el ekonomıkasyn nyǵaıtý úshin startap-mádenıetti damytý jáne joǵary tehnologııalyq jobalardy qoldaý. Aldaǵy ýaqytta tehnopark Qazaqstan ınnovatsııasynyń ekojúıesin damytýdyń ózegi ári lokomotıvine aınalyp, tehnologııalyq bıznesti damytý úshin halyqaralyq deńgeıde moıyndalǵan hab bolýy qajet. Jalpy Astana Hub 2022 jylǵa qaraı startap-rezıdentterdi ınvestıtsııalaý kórsetkishin 67 mlrd teńgege jetkizýdi maqsat etip otyr.
