Prezıdent Astana, Almaty jáne oblys ortalyqtarynda balalarǵa Jaratylystaný mýzeıin ashýdy usyndy
ASTANA. KAZINFORM — Memleket basshysy Qasym-Jomart Toqaev balalarǵa qaýipsiz ári qolaıly orta qalyptastyrýǵa búkil qoǵam atsalysýy kerektigin aıtyp, «Adal azamat» tárbıe baǵdarlamasynyń aıasyn keńeıtýdi jáne jastarǵa Konstıtýtsııa qundylyqtaryn tereń meńgertýdi tapsyrdy.
Prezıdent respýblıkalyq Tamyz konferentsııasynda kitap oqý mádenıetin nasıhattaýǵa aıryqsha nazar aýdarý qajettigin aıtty.
— Bıyl tıisti Jarlyqqa qol qoıdym. Úkimet osy jumysqa qoǵam belsendilerin, shyǵarmashylyq pen ǵylymı qaýymdastyq ókilderin, jýrnalıster men kásipkerlerdi kóptep tartqany jón. Balalardyń ǵylymǵa qyzyǵýshylyǵyn oıatpasaq, adam áleýetin nyǵaıtý múmkin emes, — dedi Qasym-Jomart Toqaev.
Bul iste oqýshylarǵa arnalǵan ǵylymı mýzeıler men zertteý ortalyqtary mańyzdy ról atqaratynyn álemdik tájirıbe kórsetip otyr.
Dál osyndaı alańdar oqýshylarǵa bilimin is júzinde qoldanyp kórýge, tájirıbe júrgizýge, ǵalymdardyń eńbegimen tanysýǵa jáne bolashaq mamandyǵyn sanaly túrde tańdaýǵa múmkindik beredi.
— Osy oraıda Astanada, Almatyda jáne birqatar oblys ortalyǵynda balalarǵa arnalǵan Jaratylystaný mýzeıin ashý oryndy dep sanaımyn. Eki jylda Astana, Almaty, Qyzylorda qalalarynda Prezıdenttik kitaphanalar óz jumysyn bastaıdy. Mundaı kitaphanalardy Shymkentte jáne basqa da oblys ortalyqtarynda salý josparda bar. Demeýshiler atalǵan bastamaǵa qoldaý bildiredi dep senemin, — dedi Memleket basshysy.
Buǵan deıin Prezıdent 7 myń bala qant dıabetine shaldyqqanyn aıtyp, fast-fýd jarnamasyn muqııat zerdeleýdi tapsyrǵan edi.
Sondaı-aq Qasym-Jomart Toqaev 16 jasqa tolmaǵandardyń áleýmettik jelide tirkelýine tyıym salý týraly zań jobasyn Quryltaıda qaraýdy usynyp, balalarǵa arnalǵan SIM-kartalardy engizýdi tapsyrdy.
