Prezıdent Astana ákimine birqatar tapsyrma berdi
ASTANA. KAZINFORM - Memleket basshysy Astana qalasynyń ákimi Jeńis Qasymbekti qabyldady, dep habarlaıdy Aqorda.
Qasym-Jomart Toqaevqa elordanyń áleýmettik-ekonomıkalyq jáne ınfraqurylymdyq damýy jóninde esep berildi.
Jeńis Qasymbek qalanyń barlyq ekonomıkalyq kórsetkishi boıynsha oń dınamıka baıqalatynyn aıtty. Bıylǵy 9 aıda tartylǵan ınvestıtsııa kólemi 1 trıllıon 140 mıllıard teńgeni qurady. Bul – 2023 jyldyń osy kezeńimen salystyrǵanda 16 paıyzǵa joǵary.
Memleket basshysyna jylytý maýsymy jóninde baıandaldy. Byltyr «Ońtústik-Shyǵys» gaz jylý stantsııasyn, «Turan» gaz jylý stantsııasy men úshinshi jylý elektr ortalyǵynyń birinshi kezeńderin paıdalanýǵa berý nátıjesinde qalada jylý qýaty alǵash ret artyǵymen óndirile bastady. Atalǵan nysandar Astanany 1100 Gkal/caǵattan astam jylý qýatymen qamtamasyz etti.
Jyl sońyna deıin «Turan» gaz jylý stantsııasynyń ekinshi kezeńin aıaqtaý josparlanyp otyr. Sol kezde shaharǵa qosymsha 250 Gkal/saǵat jylý beriledi.
Budan bólek Jeńis Qasymbek qazir jalpy qýaty 970 Gkal/saǵat bolatyn «Telman» gaz jylý stantsııasyn salý jáne «Ońtústik-Batys» gaz jylý stantsııasyn jobalaý jumystary júrgizilip jatqanyn jetkizdi.
Prezıdentke áleýmettik nysandar (mektep, qoljetimdi baspana, medıtsınalyq mekemeler) salý, qurylysy uzaqqa sozylǵan turǵyn úılerdi aıaqtaý, tozyǵy jetken apatty úılerdi buzý jóninde aıtyldy.
Mysaly, Astanada jańa oqý jylyna josparlanǵan 24 mekteptiń 15-i paıdalanýǵa berildi. Onyń ishinde 9 bilim oshaǵy «Jaıly mektep» ulttyq jobasy aıasynda boı kóterdi. Jańa jylǵa deıin 4,5 myńǵa jýyq oryndy qamtamasyz etetin 6 stýdenttik jataqhana salý josparlanǵan bolatyn. Búginde onyń tórteýine stýdentter ornalasqan.
Qala ákiminiń aıtýynsha, elordada 170-ke tarta aýla men qoǵamdyq keńistik abattandyrylyp, 70-ten astam kóshe jóndeýden ótken. Sondaı-aq mıllıon túp aǵash pen jasyl jelek egý josparlanyp otyr.
Kezdesý sońynda Prezıdent elordany odan ári damytý, kólik ınfraqurylymyn nyǵaıtý jáne kóriktendirý boıynsha birqatar tapsyrma berdi.
Eske salsaq, elordada stıhııalyq polıgondardan 160 myń tonnadan astam qoqys shyǵaryldy.
