Prezıdent: Astana AI Film festıvali — naǵyz ozyq ınnovatsııalyq is-shara
ASTANA. KAZINFORM — Aqordada ustazdardyń kásibı merekesine oraı ótken saltanatty is-sharada Qasym-Jomart Toqaev elordamyzda tuńǵysh ret ótken Astana AI Film festıvali týraly sóz qozǵady. Bul týraly Aqorda málim etti.
Prezıdent aldymyzda aýqymdy mindet turǵanyna nazar aýdardy. Bul — jahanda tsıfrlyq órkenıet pen bilim ekonomıkasy saltanat qurǵan dáýirde ómir súrip, ónegeli istermen aınalysatyn azamattar býynyn tárbıelep shyǵarý.
— Sondyqtan meniń tapsyrmammen Jasandy ıntellektini orta bilim berý júıesine josparly túrde engizý úderisi bastaldy. Durys paıdalana bilse, jańa tehnologııa muǵalimderdiń qyzmetin áldeqaıda jeńildetedi, olardy artyq jumystan bosatatyn senimdi quralǵa aınalady. Tálimgerlikke den qoıyp, oqýshylarmen tikeleı jumys isteýi úshin ustazdardyń ýaqyty bolýǵa tıis. Bul baǵytta mańyzdy qadam jasaldy. Bıyl qyrkúıek aıynda Oqý-aǵartý mınıstrligi Bilim berý salasyndaǵy jasandy ıntellektini qoldaný standartyn bekitti. Qalada nemese shalǵaı aýylda ornalasqanyna qaramastan, elimizdegi barlyq mektep ozyq ádisteme men tsıfrlyq platformaǵa qol jetkizedi. Bastama jaqsy. Jumys durys baǵytta júrip jatyr. Halyqaralyq PISA-2025 zertteýiniń nátıjesi boıynsha mektepterimizdiń tsıfrlyq daıyndyq deńgeıi Ekonomıkalyq yntymaqtastyq jáne damý uıymyna múshe memleketterdiń ortasha kórsetkishinen asty. Oqýshylardyń kognıtıvti beıimdelý ındeksi ortashadan joǵarylady. Alaıda bul joldyń basy ǵana, toqmeıilsýge sebep emes. Alda aýqymdy jumys kútip tur. Osy jetistikpen toqtap qalýǵa bolmaıdy, — dedi Memleket basshysy.
Prezıdent ótken aptada Astanada jasandy ıntellekt taqyrybyna arnalǵan aýqymdy is-sharalar ótkenine toqtaldy.
— AI & Digital Bridge — 2026 forýmy, sondaı-aq belgili mamandar men sarapshylardyń qatysýymen Jasandy ıntellektini damytý jónindegi keńestiń otyrysy boldy. Osy otyrysta Qazaqstannyń asa mańyzdy salada mol tabysqa jetkeni atalyp ótti. Biraq bul jaıbaraqat otyrýǵa bolady degen sóz emes. Sebebi jasandy ıntellekt pen jańa tehnologııalar óte joǵary qarqynmen damyp jatyr. Bul — ýaqyt talaby. Budan bólek, elordamyzda tuńǵysh ret Astana AI Film festıvali ótti. Shyn máninde, bul — naǵyz ozyq ınnovatsııalyq is-shara dep aıtýǵa bolady. Óıtkeni dál osy óte ózekti jáne mańyzdy shara aıasynda Astana qalasynda álemde alǵash ret jasandy ıntellektiniń kıno ónerindegi kórinisi paıda boldy. Basqasha aıtsaq, atalǵan festıval burynnan qalyptasqan dástúrli kıno óndirisiniń ózektiligi azaıa bastaǵanyn kórsetti. Endi fılm túsirýmen aınalysatyn mamandar sheneýnikterdiń, demeýshilerdiń jáne prodıýserlerdiń qoldaýyna táýeldi bolmaı, óz betimen tolyqqandy kıno týyndysyn shyǵara alady. Sondyqtan Astanada ótken bul naǵyz jahandyq aýqymdaǵy fılm festıvaline álem jurtshylyǵy aıryqsha nazar aýdardy, — dedi Qasym-Jomart Toqaev.
Eske sala keteıik, 2 qazan kúni Memleket basshysy Astana AI Film Festival jasandy ıntellekt qoldanǵan fılmderdiń birinshi halyqaralyq baıqaýyna qatysty.
Prezıdent jasandy ıntellektiniń tyń múmkindikteri jastardyń áleýetin arttyrýǵa jol ashatynyn aıtqan bolatyn.
