Prezıdent: Assambleıa sessııalarynda qabyldanǵan sheshimderdi memorgandar mindetti túrde eskerýge tıis
ASTANA. KAZINFORM – Memleket basshysy Qasym-Jomart Toqaev Qazaqstan halqy Assambleıasynyń HHHІV sessııasynda Assambleıa qurylymynda tórt myńnan astam qoǵamdyq uıym jumys isteıtinin atap ótti.
- Assambleıa qoǵamdyq uıymdarmen jáne ınstıtýttarmen tyǵyz baılanysta jumys istep, elimizdiń ishki saıasatyn júzege asyrýǵa belsene atsalysyp keledi. Osylaısha, memleket pen qoǵam arasynda syndarly ári jemisti dıalog ornatýǵa yqpal etýde. Qazaqstan halqy Assambleıasynyń 12 múshesi Ulttyq quryltaı quramynda tabysty eńbek etip, eldik bastamalarǵa óz úlesin qosyp jatyr. Assambleıa sessııasy jyl saıyn ótedi. Onda qabyldanǵan sheshimderdi memlekettik organdar mindetti túrde eskerýge tıis. Sessııalar aralyǵyndaǵy jumysty Assambleıa keńesi atqarady. Onyń quramyna etnomádenı birlestikterdiń ókilderi, qoǵam qaıratkerleri, Parlament depýtattary, mınıstrler men ákimder kiredi. QHA Hatshylyǵy Prezıdent Ákimshiliginiń derbes qurylymdyq bólimi sanalady, - dedi Memleket basshysy.
Prezıdent barlyq óńirde Dostyq úıi bar ekenin eske saldy.
- Onda myńnan astam etnomádenı birlestikter ornalasqan. Sondaı-aq oblys ákimdikterinde «Qoǵamdyq kelisim» memlekettik mekemeleri quryldy. Assambleıa qurylymynda tórt myńnan astam qoǵamdyq uıym jumys isteıdi. Bul uıymdardyń maqsaty – bir, bul – azamattarymyzdy eldik mańyzy bar jumysqa tartý, ıaǵnı ortaq iske jumyldyrý. Mysaly, Aqsaqaldar keńesi men Analar keńesi otbasy ınstıtýtyn nyǵaıtýǵa, jalpyulttyq qundylyqtardy dáripteýge atsalysyp, aýqymdy jumys júrgizýde, - dedi Qasym-Jomart Toqaev.
Sondaı-aq, Prezıdent QHA ardagerleriniń «Adal azamat» biryńǵaı tárbıe baǵdarlamasyn júzege asyrýǵa belsendi túrde qatysyp jatqanyn joǵary baǵalady.
- Sońǵy ýaqytta Assambleıa qyzmetindegi sarapshylyq quramnyń sapasy jańa deńgeıge kóterildi. Ǵylymı-sarapshylar keńesi men 42 Assambleıa kafedrasy ult qurylymy men etnosaralyq qarym-qatynastar úderisin zertteıtin 360-tan astam sarapshyny biriktirip otyr, - dedi Memleket basshysy.
Aıta keteıik, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr.
Keńeıtilgen otyrystyń kún tártibi — «Qazaqstan halqy Assambleıasynyń 30 jyldyǵy: qorytyndylar jáne bolashaq mindetter».