Prezıdent Assambleıa múshelerine bir syryn ashyp berdi

ASTANA. QazAqparat - Búgin Qazaqstan halqy Assambleıasynyń XXV sessııasynda Memleket basshysy Nursultan Nazarbaev kókeıinde júrgen bir syryn aıtyp berdi, dep habarlaıdy QazAqparat tilshisi.

«Men san alýan adamdardyń aldynda sóz sóıleımin, kóp baıandama jasaımyn. Búgin bir nárseni ashyq aıtqym kelip otyr. Shynymdy aıtsam, men sizderdiń aldynda sóz sóıleýdi unatamyn. Sebebi sizder, Assambleıa músheleri, eń qaıyrymdy tyńdarmansyzdar. Men ózara úndestikti sezinemin. Sizderdiń meni qoldap otyrǵandaryńyzdy sezip otyramyn. Sol úshin sizderge alǵys aıtamyn», - dedi Nazarbaev.

Prezıdenttiń aıtýynsha, barlyq kontsertterdiń ishinen oǵan etnomádenı birlestikterdiń kontsertteri unaıdy. «Árıne, bizde balet, opera bar. Biz oǵan aqyryndap úırenip kelemiz. Degenmen, onyń barlyǵy - syrttan kelgen mádenıet. Al halyqtyń ózinen shyqqan rýhanı azyqqa eshteńe jetpeıdi. Sebebi ol áýen, ol mýzyka ana sútimen darıdy, tabıǵat pen jerdiń qudiretimen sińedi. Sondyqtan bizdiń Assambleıamyz - Táýelsizdigimizdiń úlken jetistigi deýge bolady. Sizdermen kezdesip otyrǵanyma qýanyshtymyn», - dep atap kórsetti Nazarbaev.