Prezıdent áskerı oqý oryndarynyń úzdik túlekterine aǵa leıtenant shenin tapsyrdy
ASTANA. KAZINFORM – Memleket basshysy Qasym-Jomart Toqaev Memlekettik tý kóterý rásiminde áskerı oqý oryndarynyń úzdik túlekterine «aǵa leıtenant» shenin tapsyrdy. Bul bastama bıyl alǵash ret iske asyrylyp otyr.
– Men byltyr áskerı oqý oryndarynyń úzdik túlekterin qoldaý jóninde bastama kóterdim. Olarǵa qalyptasqan dástúrge saı «leıtenant» emes, «aǵa leıtenant» shenin tapsyrý qajet ekenin aıttym. Soǵan sáıkes naqty tapsyrma berdim. Mine, búgin osy bastama naqty júzege asyrylmaq. Sizder oqýdy bitirip, birden «aǵa leıtenant» shenin alatyn tuńǵysh túlek bolasyzdar. Bul – ózderińizge artylǵan zor senim jáne úlken jaýapkershilik, – dedi Qasym-Jomart Toqaev.
Prezıdent jańa áskerı shendi Saǵadat Nurmaǵambetov atyndaǵy Qurlyq áskerleri áskerı ınstıtýtynyń, QR ІІM B. Beısenov atyndaǵy Qaraǵandy akademııasynyń, QR UQK Shekara akademııasynyń, QR Ulttyq ulany Akademııasynyń, Málik Ǵabdýllın atyndaǵy Azamattyq qorǵaý akademııasynyń úzdik túlekterine tabystady.
Q. Toqaev qazaqtyń birtýar batyry Saǵadat Nurmaǵambetovtiń «ataqty alǵannan ony arqalap júrý qıyn» degen sózin eske saldy. Shyn máninde, naǵyz sarbazdyń abyroı-bedeli onyń shenimen emes, eń aldymen, Otan aldyndaǵy minsiz qyzmetine qaraı ólshenedi.
– Kóptegen jastarymyz sizderge qarap boı túzeıdi, úlgi alady. Bárińiz de antqa adal bolyp, qazaq sardary degen ataqqa árdaıym laıyq bolasyzdar dep senemin. Búgin alqaly jıynǵa ozat túlekterdiń ata-analary da qatysyp otyr.
Sizder Qazaqstannyń dál osyndaı otanshyl azamattaryna tálim-tárbıe berdińizder. Barshańyzǵa shynaıy rızashylyǵymdy bildiremin. Jas ofıtserlerdiń alǵashqy áskerı sheni qutty bolsyn! Qyzmetterińizge tabys tileımin! Týymyz árdaıym kókte jelbiresin! Qazaq eli máńgi bolsyn, – dep quttyqtady Prezıdent.
Eske sala ketsek, byltyr Memleket basshysy quqyq qorǵaý organdarynyń keńeıtilgen alqa májilisinde salaǵa reforma qajet ekenin aıtqan edi. Prezıdent zań jáne quqyq akademııalarynyń úzdik túlekterine birden «aǵa leıtenant» shenin berýdi usyndy.
Aıta keteıik, 4 maýsymda elimizde Memlekettik rámizder kúni atap ótiledi. Osydan 34 jyl buryn táýelsiz Qazaqstannyń óz Eltańbasy, Týy jáne Ánurany bekitildi.
Prezıdent bul kún – qazaq eliniń árbir azamaty úshin mańyzy erekshe mereke ekenin aıtty.
Sondaı-aq, Qasym-Jomart Toqaev Táýelsizdigimizdiń 35 jyldyǵyn naqty nátıjelermen qarsy alý kerektigin tapsyrdy.
