Prezıdent «Asyl mura» ulttyq syılyǵyn taǵaıyndady
ASTANA. KAZINFORM — Dástúrli ónerdi dáriptep júrgen ónerpazdarǵa «Asyl mura» ulttyq syılyǵy taǵaıyndalady. Bul týraly Aqordada mádenıet jáne óner qyzmetkerlerin marapattaý rásiminde Memleket basshysy Qasym-Jomart Toqaev aıtty.
— Budan bólek, dástúrli ónerdi, ásirese jyr, terme, kúı ónerin damytýǵa erekshe mán berýmiz kerek. Tól órkenıetimizdiń osyndaı teńdessiz qazynalaryn dáriptep júrgen óner adamdaryna qoldaý kórsetý mańyzdy. Osy oraıda men «Asyl mura» ulttyq syılyǵyn taǵaıyndaý týraly sheshim qabyldaıtyn boldym, — dedi Qasym-Jomart Toqaev.
Memleket basshysynyń paıymynsha, bul marapat dástúrli óner ókilderin qoldaýǵa, olardyń shyǵarmashylyǵyn nasıhattaýǵa, ulttyq ónerdiń bedelin arttyrýǵa yqpal etedi.
— Osy joǵary dárejeli syılyqpen tıisti mınıstrliktiń usynysy boıynsha Memleket basshysynyń Jarlyǵymen laıyqty óner jáne mádenıet qaıratkerleri marapattalady. Jalpy, mádenıet pen óner salasy el ómiriniń ajyramas bóligi retinde árdaıym memleket nazarynda bolady, — dedi Prezıdent.
Buǵan deıin Prezıdent mádenıet jáne óner salasy mamandaryna alǵys bildirgenin jazǵan edik.
