Prezıdent Asia Infrastructure Solutions Singapore tóraǵasy Vong Hen Faındy qabyldady
ASTANA. KAZINFORM — Memleket basshysy Asia Infrastructure Solutions Singapore kompanııasynyń tóraǵasy Vong Hen Faındy qabyldady.
Kezdesýde Alatau City jobasyn júzege asyrý perspektıvasy talqylandy.
Atap aıtqanda, Qasym-Jomart Toqaev pen Vong Hen Faın sheteldiń ınvestıtsııasyn, tehnologııasyn jáne bilim áleýetin tarta otyryp, Alataý qalasyn tıimdi damytý jóninde egjeı-tegjeıli pikir almasty.
Prezıdent sıngapýrlyq Surbana Jurong kompanııasymen birlese daıyndalǵan Alataý qalasynyń Bas jospary bıyl mamyr aıynda qabyldanǵanyn aıtty.
Memleket basshysy osy tektes jobalardy júzege asyrýda Vong Hen Faınnyń mol tájirıbesi bar ekenin atap ótti. Sondyqtan onyń bas konsýltant retinde bergen usynymdary halyqaralyq bıznes-habqa aınalýdy kózdeıtin jańa qalany jobalaý jáne salý isinde naqty nátıjege ulasatynyna senim bildirdi.
