Prezıdent arýlardy kóktem merekesi – Halyqaralyq áıelder kúnimen quttyqtady
ASTANA.KAZINFORM — Memleket basshysy Qasym-Jomart Toqaevtyń qatysýymen 8 naýryz – Halyqaralyq áıelder kúnine arnalǵan saltanatty jıyn ótti. Bul týraly Aqorda málim etti.
— Búgin men barshańyzdy kóktem merekesi — Halyqaralyq áıelder kúnimen shyn júrekten quttyqtaımyn! Bul meıramdy shyn máninde sulýlyqtyń kórinisi deýge bolady. Sebebi áıel jany qashanda ádemilikke jaqyn. Arýlarymyz álemge súıispenshilikpen qarap, jan-jaǵyna jaqsylyq sharapatyn syılap júredi. «Áıel bir qolymen besikti terbetse, bir qolymen álemdi terbetedi» degen sóz beker aıtylmaǵan. Áıel — shańyraqtyń shyraǵy, ulttyń uıytqysy. Ana — tirshilik pen berekeniń bastaýy, adamzat boıyndaǵy bar izgiliktiń qaınar kózi. Ananyń aıaly alaqany men sheksiz meıirimi ár úıge jylylyq beredi. Salt-dástúrimiz ben ana tilimizdiń búgingi kúnge jetýi de — eń aldymen, analardyń arqasy. Ómirdiń máni de, tirshiliktiń sáni de — sizder! Sondyqtan búgingi meıramda barsha er-azamattar ózderińizge aq tilegin arnap, yqylas-iltıpatyn bildirip jatyr. Solardyń ishinde men de Memleket basshysy retinde áıelderge tilegimdi, lebizimdi aıtyp turmyn, — dedi Prezıdent quttyqtaýynda.
Qasym-Jomart Toqaev Qazaqstannyń san túrli salada jetistikke jetýine qyz-kelinshekter mol eńbek sińirgenin aıtty.
— Halqymyzda erlik pen eldiktiń týyn bıik ustaǵan arýlar az emes. Olardyń esimi el shejiresine altyn árippen jazylǵan. Tumar men Bopaı hanymdardyń, Domalaq ana, Zere jáne Ulpan analardyń, Álııa, Mánshúk, Hıýaz sekildi batyr qyzdarymyzdyń aty el jadynda. Sizderdi aqyly men ajary, danalyǵy men daralyǵy kelisken qazaq áıeliniń izbasary deýge bolady. Áıelder qaýymy kúrdeli kezeńderde aıanbaı eńbek etti, Otanymyzdyń ósip-órkendeýine belsene atsalysty. Urpaq tárbıesi — ult tárbıesi. Búginde Sizder sanasy sergek, oıy azat urpaq ósirip, Otanymyzdyń órken jaıýyna aıryqsha úles qosyp kelesizder. Qazaqstannyń san túrli salada jetistikke jetýine qyz-kelinshekterimiz mol eńbek sińirýde. Búgin Aqordaǵa shaqyrylǵan áıelder arasynda Otanymyzǵa ár salada eńbek sińirgen bilikti mamandar bar. Men barshańyzǵa zor alǵys aıtamyn, — dedi Memleket basshysy.
Memleket basshysy analary alańsyz qoǵamda balalar da baqytty ómir súretinin aıtty.
— Qymbatty hanymdar, Sizder, álemge ádemilik pen úılesim, shańyraqqa jylylyq pen jaılylyq syılap kelesizder. Sizderge óskeleń urpaqty tárbıeleý, otbasylyq qundylyqtardy ilgeriletý sekildi aıryqsha jaýapkershilik júktelgen. Barlyq salada adal eńbek etip, tabandy da tıimdi jumystaryńyzben memleketimizdiń áleýeti men bedelin nyǵaıtyp júrsizder. Analary alańsyz qoǵamda balalar da baqytty ómir súredi. Ana men balanyń jaǵdaıy durys bolsa, áleýmettiń jaǵdaıy da durys bolady. Sondyqtan bolashaǵyn oılaǵan el, eń aldymen, áıelderdiń jaǵdaıyn jaqsartýdy oılaıdy, — dedi Qasym-Jomart Toqaev.
Prezıdent memlekettiń áıelderdi barynsha qorǵaýǵa jáne jan-jaqty qoldaýǵa basa mán beretinin atap ótti.
— Memleketimiz áıelderdi barynsha qorǵaýǵa jáne jan-jaqty qoldaýǵa basa mán beredi. Osy baǵytta naqty jumystar atqarylyp jatyr. Meniń tapsyrmammen otbasy ınstıtýtyn nyǵaıtýdy kózdeıtin mańyzdy sharalar qabyldandy. Barlyq aımaqta qıyn jaǵdaıǵa tap bolǵan otbasylarǵa qoldaý kórsetetin ortalyqtar ashylyp jatyr. Kóp balaly analardy qoldaýdyń ulttyq modeli qalyptasty. Sonyń arqasynda jyl ótken saıyn kóp balaly otbasylardyń sany artyp keledi, — dedi ol.
Qasym-Jomart Toqaev áıelderdiń laýazymdy qyzmetterdi jaýapkershilikpen atqaryp júrgenin jetkizdi.
– Qazir áıelder túrli salada tabysty eńbek etip júr. Memlekettik qyzmetshilerdiń jartysynan kóbi – áıelder. Bilim berý, densaýlyq saqtaý salasyndaǵy mamandardyń 70 paıyzdan astamy da – áıelder qaýymy. Sondaı-aq olar tótenshe jaǵdaılar, qorǵanys jáne quqyq qorǵaý organdarynda tabysty jumys istep júr. Kóptegen áıelder laýazymdy qyzmetter atqarady, Sizderdiń aralaryńyzda da tabysty basshylar az emes. Qyz-kelinshekter bızneste de jetistikke jetip júr. Boılaryńyzdaǵy maqsatkerlik pen jasampazdyq qýaty eń batyl bastamalaryńyzdy júzege asyrýǵa kómektesip keledi. Berik azamattyq ustanymdaryńyzdy tanytyp, qoǵamdyq jumysqa da jan-jaqty atsalysasyzdar. Mańyzdy bastamalar men halyqqa qajetti áleýmettik jobalardy iske asyryp júrsizder. Qaı ispen aınalyssańyzdar da jaýapkershilikpen qarap, udaıy oń nátıjege qol jetkizip kelesizder, – dedi Prezıdent.
«Qazaqstannyń eńbek sińirgen qurylysshysy», «Qazaqstannyń eńbek sińirgen ónerkásip qaıratkeri» qurmetti ataqtary alǵash ret tabystaldy.
– Álemdik dodalarda top jaryp, elimizdiń abyroıyn asqaqtatyp júrgen arýlarymyz da bar. Biz qajyrly eńbegimen, eren erligimen tanylǵan qyz-kelinshekterdi maqtan tutamyz. Táýelsizdik jyldary óz salasynyń úzdigi atanǵan 8 áıelge «Qazaqstannyń Eńbek Eri» ataǵy berildi. Bıyl elimizde – «Jumysshy mamandyqtary jyly». Qazir osy saladaǵy bilikti mamandardyń mártebesin kóterý úshin belsendi jumys júrgizilip jatyr. Mysaly, memlekettik marapattar júıesine jańadan 9 qurmetti ataq engizildi. Búgin osyndaı eki marapat alǵash ret tapsyrylady. «Qazaqstannyń eńbek sińirgen qurylysshysy» ataǵy eńbek ardageri Olga Shelýdkoǵa beriledi. Al óndiris ozaty Maıra Ermanova «Qazaqstannyń eńbek sińirgen ónerkásip qaıratkeri» atanyp otyr. Osyndaı naǵyz eńbek adamdaryna búkil el bolyp qurmet kórsetip, olardy jan-jaqty dáripteýimiz kerek. Jumysshy mamandyqtary jylynyń túpki máni de – osy, – dedi Memleket basshysy.
Eske sala keteıik, memlekettik nagradalar júıesine 9 jańa qurmetti ataq engizilgen bolatyn.