Prezıdent arnaýly ókilge Aýǵanstanmen ózara tıimdi yqpaldastyqty jolǵa qoıýdy tapsyrdy
ASTANA. KAZINFORM - Qasym-Jomart Toqaev Prezıdenttiń Aýǵanstan boıynsha arnaýly ókili Erkin Tuqymovty qabyldady, dep habarlaıdy Aqordanyń baspasóz qyzmeti.
Memleket basshysy Aýǵanstan bıligimen ekijaqty qarym-qatynasty nyǵaıtýda arnaýly ókildiń erekshe ról atqaratynyn atap ótti.
Arnaýly ókilge atalǵan elmen saýda-ekonomıkalyq jáne gýmanıtarlyq salalarda ózara tıimdi yqpaldastyqty jolǵa qoıý tapsyryldy.
Prezıdent Almaty qalasynda ashylǵan Ortalyq Azııa men Aýǵanstan úshin ornyqty damý maqsattary jónindegi BUU aımaqtyq ortalyǵynyń múmkindikterin keńinen paıdalanýdyń mańyzyna toqtaldy.
Qasym-Jomart Toqaevtyń aıtýynsha, Qazaqstan Aýǵanstandaǵy qaýipsizdik pen turaqtylyqty saqtaý maqsatynda gýmanıtarlyq jáne bilim berý bastamalaryn jalǵastyra berýge nıetti.
Osyǵan deıin Premer-mınıstrdiń orynbasary Qanat Bozymbaevtyń óńirlerdi damytý boıynsha qolǵa alynǵan sharalar týraly Prezıdentke esep bergeni jóninde jazdyq.