Prezıdent: Armanym – Qazaqstannyń bolashaqta tolyqqandy tsıfrly elge aınalýy
ASTANA. KAZINFORM – Prezıdent Qasym-Jomart Toqaev qatarlyq Al Jazeera telearnasyna bergen eksklıýzıv suhbatynda elimizdi tsıfrlandyrý máselesine toqtaldy.
Al Jazeera: Qazaqstan ІT-ındýstrııasy men tsıfrlyq ınfraqurylymda jaqsy jetistikke jetti. Sizder 20 myń shaqyrymnan astam optıkalyq-talshyqty jeli tarttyńyzdar. Astanada ortalyq quryldy, 2023 jyly ІT-tehnologııalar eksporty 280 mln-nan astam dollarǵa artty. Degenmen áli de bolsa máseleler bar. Qazaqstan startaptar úshin bıýrokratııalyq kedergilerdi, keı jaǵdaıda mamandar jetispeýshiligi men zertteýlerge jáne ázirlemelerge arnalǵan tómen shyǵystarǵa qatysty máselelerdi qalaı sheshpek?
– Bul da kún tártibinde turǵan máselelerdiń biri. Biraq biz bul baǵytta aıtarlyqtaı jetistikke jettik. Eń aldymen aqyldy kompıýter jasadyq. Ol taıaýda ǵana tanymal sheteldik kompanııalarmen tyǵyz yntymaqtastyqtyń arqasynda Qazaqstanǵa jetkizildi. Osynaý asa mańyzdy iste bizdiń strategııalyq seriktesimiz bolǵany úshin olarǵa óte rızamyz. Buǵan deıin aıtqanymdaı, bizdiń basymdyǵymyz – tsıfrlandyrý. Armanym – Qazaqstannyń bolashaqta tolyqqandy tsıfrly elge aınalýy.
Eske sala keteıik, budan buryn Memleket basshysy Qasym-Jomart Toqaev BUU-ny reformalaýǵa qatysty paıymymen bóliskenin jazǵan edik.