Prezıdent Arkadıı Dvorkovıchti ІІ dárejeli «Dostyq» ordenimen marapattady
ASTANA. KAZINFORM — Qasym-Jomart Toqaev Halyqaralyq shahmat federatsııasynyń (FIDE) prezıdenti Arkadıı Dvorkovıchti qabyldady. Bul týraly Aqorda málim etti.
Kezdesýde Memleket basshysy Uıymnyń Qazaqstan shahmat federatsııasyna, jattyqtyrýshylar men jas sportshylarǵa kórsetken qoldaýyn joǵary baǵalady.
Prezıdent elimizde shahmat sport túri ǵana emes, zııatkerlik mádenıettiń, tárbıe men bilimniń mańyzdy bóligi sanalatynyn atap ótti.
Memleket basshysy balalar men jastar arasynda shahmatqa qyzyǵýshylyqtyń artyp kele jatqanyna nazar aýdardy. Prezıdenttiń aıtýynsha, bilim berý júıesinde shahmat ınfraqurylymyn damytýǵa jáne ilgeriletýge basa mán berilip otyr.
Áńgimelesý barysynda ulttyq federatsııanyń Uıymmen jan-jaqty yntymaqtastyqty odan ári keńeıtý, sonyń ishinde iri halyqaralyq jarystar ótkizý men birlesken jobalardy iske asyrý máseleleri pysyqtaldy.
Arkadıı Dvorkovıch Qazaqstanda qabyldanǵan shahmatty damytýǵa arnalǵan Keshendi jospardyń mańyzy týraly aıtty. Atalǵan qujat memleket, bıznes jáne ulttyq federatsııanyń birlesip jumys isteýine jol ashady. Sondaı-aq byltyr qazaqstandyq shahmatshylar FIDE aıasynda ótken barlyq jarystan eń kóp medal jınaǵanyna nazar aýdardy.
Sondaı-aq Qasym-Jomart Toqaev Halyqaralyq shahmat federatsııasynyń prezıdenti Arkadıı Dvorkovıchti Qazaqstandaǵy shahmatty órkendetýge qosqan úlesi úshin ІІ dárejeli «Dostyq» ordenimen marapattady.
Aıta keteıik, buǵan deıin Memleket basshysy Shveıtsarııa vıtse-prezıdenti Gı Parmelanmen kelissóz júrgizgenin jazdyq.