Prezıdent arhıvinde elimizdiń 1918 jyldan bergi saıası tarıhynyń qujattary saqtaýly

ALMATY. QazAqparat - 9 maýsym – Halyqaralyq arhıv kúni. 1948 jyly ıÝNESKO sheshimimen Halyqaralyq arhıvter keńesi qurylǵan. 2007 jyly qarashada Kanadanyń Kvebek qalasyndaǵy Bas assambleıada «9 maýsym – Halyqaralyq arhıvter kúni» dep resmı túrde bekitildi, dep habarlaıdy QazAqparat tilshisi.

Ataýly kúnge oraı Prezıdent arhıviniń qoǵammen baılanys mamany Daıana Toqbergenovamen áńgimelesken edik.

«Prezıdent arhıvi Tuńǵysh Prezıdent Nursultan Nazarbaevtyń 1994 jylǵy 14 qańtardaǵy Jarlyǵymen burynǵy Ortalyq memlekettik qazirgi zaman tarıhy arhıviniń negizinde qurylǵan. Búgingi tańda arhıvte 1014 qor bar, onda 856 myńnan astam is qamtylǵan. Arhıvte 1918 jyldan bastap elimizdiń saıası tarıhynyń qujattary bar. Sonymen birge, qoǵam qaıratkerleriniń jeke tektik qujattary men basqarý qujattamasy da jınaqtalǵan. Táýelsizdik alǵannan keıingi Prezıdent aktileriniń túpnusqalary, halyqaralyq jıyndardaǵy baıandama mátinderi, fotosýretteri saqtaýly», - deıdi arhıv qyzmetkeri.

Sondaı-aq Daıana Toqbergenova elimizde qujattardy qunttaıtyn 200-den asa arhıv bar ekenin aıtty.

«Olar 1998 jylǵy 22 jeltoqsandaǵy «Ulttyq arhıv qory jáne arhıvter týraly» Zańǵa sáıkes jumys isteıdi. Jalpy arhıvtik derekter adamzattyń saıası tarıhy, ekonomıkalyq jáne áleýmettik damýynyń qujattaryn jınaıtyn negizgi mekeme sanalady. Sondyqtan Arhıvter kúni sala mamandarynyń kásibı merekesi ǵana emes, jalpy halyqtyń nazaryn aýdarý úshin belgilengen ataýly data», - dep atap ótti ol.

Aıta keteıik, Qazaqstanda arhıvshiler kúni 2020 jylǵy Úkimet qaýlysymen 22 jeltoqsan dep bekitilgen. Al Reseıde bul kún 10 naýryzda, Belorýssııada 6 jeltoqsanda, Qyrǵyzstanda 30 tamyzda atap ótiledi. Al búgin dúnıejúzine ortaq Halyqaralyq arhıvter kúni atap ótilýde.