Prezıdent arhıvi ICA Barcelona 2025 halyqaralyq kongresinde óz tájirıbesin tanystyrdy

ASTANA. KAZINFORM – Barselonada ICA Barcelona 2025 «Knowing Pasts, Creating Futures» taqyrybynda Halyqaralyq arhıvter kongresi jumysyn bastady.

Álem arhıvshileriniń eń iri kásibı basqosýyna QR Prezıdenti arhıviniń dırektory Álııa Mustafına bastaǵan delegatsııa qatysýda.

Kongress 27-30 qazan aralyǵynda ótedi, forým ondaǵan elden kelgen arhıvshiler, zertteýshiler men sarapshylardy biriktirip otyr. Baǵdarlama aıasynda plenarlyq otyrystar, taqyryptyq sessııalar, semınarlar men sheberlik sabaqtary uıymdastyrylǵan. Negizgi taqyryptar – arhıvterdi tsıfrlandyrý, jasandy ıntellektini qoldaný, derekterdiń ashyqtyǵyn qamtamasyz etý jáne arhıv qorlarynyń saqtalýyn jetildirý.

Forýmnyń alǵashqy kúni Qazaqstan Respýblıkasy Prezıdenti Arhıviniń delegatsııasy Halyqaralyq arhıvter keńesiniń sandyq jáne fızıkalyq jazbalardy basqarý jónindegi sarapshylar toby – Expert Group on Managing Digital and Physical Records ashyq otyrysyna qatysty. Bul topqa álemniń jetekshi arhıv mamandary kiredi.

Talqylaý kezinde qatysýshylar arhıvterdi tsıfrlyq formatqa kóshirý kezinde týyndaıtyn negizgi qıyndyqtardy atap ótti. Atap aıtqanda, sandyq jáne dástúrli arhıvterdiń ózara baılanysyn qamtamasyz etý, derekterdi uzaq ýaqyt saqtap qalý, aqparattyń qaýipsizdigi men senimdiligin saqtaý, ony kıbershabýyldar men tehnıkalyq aqaýlardan qorǵaý qajettigi sóz boldy.

Sarapshylar erekshe nazardy adam faktoryna aýdardy. Kópshiliktiń pikirinshe, ІT-sheshimderdi sátti engizý tek tehnologııalarǵa ǵana emes, sonymen qatar arhıv qyzmetkerleriniń kásibı daıyndyǵyna baılanysty. Buǵan protsesterdi durys uıymdastyrý, jobalarǵa erte kezeńnen qatysý jáne uıym ishindegi ózgeristerdi tıimdi júzege asyrý qabileti jatady.

Aıta keteıik, QR Prezıdentiniń Arhıvi 2023 jyldan bastap Halyqaralyq arhıvter keńesiniń (ICA) múshesi. Arhıv otandyq tájirıbeni álemdik deńgeıde tanystyryp qana qoımaı, halyqaralyq áriptestikti belsendi damytyp keledi.

Aıta keteıik, Sherhan Murtazanyń 6 myń bettik murasy Ulttyq arhıv qoryna tabystaldy.