Prezıdent Araldy qutqarý qorynyń jumysyn jetildirýge qatysty usynystaryn jetkizdi

Prezıdent Dýshanbede ótip jatqan Araldy qutqarý qorynyń 30 jyldyǵyna arnalǵan jıynda uıymdy odan ári damytýǵa qatysty usynystaryn ortaǵa saldy, dep habarlaıdy QazAqparat Aqordaǵa silteme jasap.

«Qordyń uıymdyq qurylymy men sharttyq-quqyqtyq bazasyn jetildirý protsesin tezirek aıaqtaý mańyzdy másele bolyp qala beredi. Qordyń basqarmasy men atqarýshy komıtetiniń ókilettigin jáne jaýapkershiligin keńeıtken jón. Memleketaralyq sý sharýashylyǵyn úılestirý komıssııasyn Memleketaralyq sý-energetıkalyq komıssııa retinde qaıta qurýdy usynamyz. Bul sharalar qordyń tıimdiligin arttyrar edi», - dep atap ótti Memleket basshysy.

Ol sondaı-aq aımaqtaǵy barlyq eldiń ırrıgatsııa, gıdroenergetıka jáne ekologııa salalaryndaǵy múddelerin eskere otyryp, Ortalyq Azııanyń sý-energetıka resýrstaryn tıimdi paıdalaný úshin uzaqmerzimdi ári ornyqty aımaqtyq yntymaqtastyq mehanızmin qurýdy usyndy.

«Bizdiń oıymyzsha, Halyqaralyq sý-energetıka kontsortsıýmy osyndaı mehanızmniń rólin atqara alar edi. Sonymen qatar Aral teńizi basseınindegi sý resýrstaryn esepke alatyn, monıtorıng jasaıtyn, basqaratyn jáne bóletin biryńǵaı avtomattandyrylǵan júıe engizý boıynsha jumys josparyn ázirleý kerek. Bul bastamanyń júzege asyrylýy aımaqtaǵy sýdy paıdalanýdyń ashyqtyǵyn qamtamasyz etip, Ortalyq Azııa elderimen aradaǵy dıalogty jáne dostyqty nyǵaıtýǵa yqpal etedi», - deıdi Qasym-Jomart Toqaev.

Onyń aıtýynsha, taǵy bir mańyzdy bastamanyń biri – Ortalyq Azııa elderiniń klımat máseleleri jónindegi jobalyq keńsesin qurý.

Bul qadam klımattyń ózgerýine beıimdelý jáne onyń saldaryn azaıtý úshin pármendi sharalar ázirleýge múmkindik beredi.

«Biz Bishkektiń qordy jetildirý jónindegi jumys tobynyń qyzmetine atsalysýyn oń baǵalaımyz. Qyrǵyz Respýblıkasy qaıtadan Halyqaralyq Araldy qutqarý qorynyń tolyqqandy múshesi bolady dep úmittenemiz. Keleshekte biz baýyrlas Qyrǵyzstannyń qorǵa tóraǵalyq etýin qýana quptaımyz», - dep túıindedi Prezıdent.