Prezıdent aralaspasa, Kenesarynyń bas súıegin elge qaıtarý múmkin emes - tarıhshy-ǵalym Tursyn Jurtbaı
ASTANA. 21 qańtar. QazAqparat /Arman Asqarov/ - Reseıdiń qazaq batyry Kenesarynyń bas súıegin qaıtarmaı jatýynyń ózindik úlken saıası sebebi bar. Sondyqtan bul jumysqa Prezıdent aralaspasa, Kenesarynyń bas súıegin elge qaıtarý múmkin emes.
Búgin Alashtyń birtýar azamaty, memleket jáne qoǵam qaıratkeri Smaǵul Sádýaqasovtyń máıitiniń kúlin Qazaqstanǵa ákelinýine baılanysty ótken jıyn aıasynda suhbat bergen tarıhshy-ǵalym Tursyn Jurtbaı osylaı aıtty.
«Kez kelgen pendeniń máńgilik turaǵy onyń týǵan jerinde bolýy tıis. Ol adam eli úshin sheıit bolsa, onda týǵan jerinen topyraq buıyrtý - halyqtyń mindeti. Smaǵul Sádýaqasov - Qazaqstannyń Táýelsizdigi, ekonomıkasy men rýhanı damýyna zor úles qosyp, tipti, memleketimizdiń shekarasyn anyqtaýǵa at salysyp, ol kezdegi asharshylyq pen repressııaǵa qarsy shyqqan qoǵam qaıratkeri. Ol - tolyqtaı eli úshin sheıit bolǵan azamat. Sondyqtan onyń súıegin elge ákelip, musylmansha jerleý bul - úlken paryz. Bul - bizdiń bostandyq rýhymyzdyń qaıtip oralýy, sol jyldary el egemendigi úshin qurban bolǵandarǵa kórsetilgen qurmet», - deıdi T.Jurtbaı.
Ǵalymnyń oıynsha, búginde burynǵy Keńes odaǵy quramynda bolǵan halyqtardyń betke ustar azamattarynyń súıegin Reseıden alyp ketýge aıtarlyqtaı saıası qarsylyq joq. «Sebebi Reseı repressııanyń zardabyn moıyndap otyr. Bul jumysty shýlatpaı, Sabyr Qasymov sııaqty azamattyq belsendilik tanytyp, aqyryn istep alýǵa bolady. Smaǵul Sádýaqasov syndy Nyǵmet Nurmaqov, Turar Rysqulov, Álıhan Bókeıhan, Júsipbek Aımaýytov, Qaıyr Ǵabbasovtardyń qaıda jatqany belgili. Olardy suratyp alý jeke azamattardyń qatysýymen sheshiletin sharýa dep oılaımyn. Al osy iske memleket aralasyp, solardyń barlyq súıekterin jıyp alý týraly qaýly shyǵarsa, bul - úlken ujymdyq jumystyń ıgi bastamasy bolar edi. Búginde Sankt-Peterbordyń kýnskamerasynda Keıki batyrdyń bas súıegi jatyr. Al, onyń ishindegi eń qıyny ol - Kenesary batyrdyń bas súıegi. Reseıde 38 600-deı bas súıek saqtalǵan. Sonyń 2 myńdaıy - Qazaqstanǵa qatysty bas súıekter. Olardyń bárin ákelý múmkin emes. Biraq Kenesarynyń bas súıegin elge qaıtarý Prezıdent pen Qaýipsizdik keńesiniń qatysýynsyz sheshilmes. Sebebi bul jumystyń erekshe saıası astary bar», - deıdi ol.
