Prezıdent: Aral máselesi salǵyrttyqtyń qandaı qasiretke ákelip soǵatynyn eske salyp turady
ASTANA. KAZINFORM – Sý qaýipsizdigi – búkil Ortalyq Azııa úshin asa mańyzdy másele. Bul týraly elordadaǵy Óńirlik ekologııalyq sammıtte Memleket basshysy Qasym-Jomart Toqaev málim etti.
- Sý qaýipsizdigi – Qazaqstan ǵana emes, búkil Ortalyq Azııa úshin asa mańyzdy másele. Bolashaǵymyz tirshilik nárin qanshalyqty utymdy ári ádil paıdalana alatynymyzǵa baılanysty. Aral teńizi salǵyrttyqtyń saldary qandaı qasiretke ákelip soǵatynyn eske salyp turady. Sondaı-aq ol batyl ári ǵylymı negizi bar júıeli sharalardyń arqasynda qandaı nátıjege jetýge bolatynyn kórsetedi, - dedi Qasym-Jomart Toqaev.
Prezıdent búgingi tańda Soltústik Araldyń 36 paıyzǵa jýyǵy qaıta qalpyna keltirilgenin eske saldy. Sýdyń sapasy jaqsaryp, balyq qory molaıdy, mańaıdaǵy eldi mekenderdiń turmys-tirshiligine qan júgirdi.
- Búgin Halyqaralyq Araldy qutqarý qorynyń joǵary deńgeıdegi kezekti otyrysyn ótkizemiz. Jıyn barysynda áriptesterimizben birge Qazaqstannyń osy uıymǵa úsh jyldyq tóraǵalyǵyn qorytyndylaımyz, - dedi Memleket basshysy.
Budan buryn habarlanǵandaı, búgin elordada Memleket basshysy Qasym-Jomart Toqaevtyń qatysýymen «Ornyqty bolashaqqa ortaq kózqaras» taqyrybymen Óńirlik ekologııalyq sammıt (ÓES) jumysyn bastady.
