Prezıdent ár qabyldaýynda ustazdardyń jaıyn suraıtyn — Ashat Aımaǵambetov
ASTANA. KAZINFORM — Ustazdardy qorǵaý men qoldaý Prezıdenttiń aıryqsha nazarynda. Bul týraly Quryltaı depýtaty Ashat Aımaǵambetov aıtyp berdi.
Depýtat óziniń Úkimet kabınetinde mınıstr bolyp jumys istegen jyldaryn eske aldy.
— Men Úkimette jumys istegende de, kez kelgen ýaqytta Memleket basshysynyń qabyldaýyna barǵanda, Prezıdenttiń eń alǵashqy qoıatyn suraǵy — ustazdardy qorǵaý jáne qoldaý jaıly bolatyn. Rasynda da jeti jyldyń ishinde bilim salasynda ustazdarǵa qatysty úlken oń ózgerister qabyldandy. Óıtkeni bul — Memleket basshysynyń óziniń shynaıy yqylasy, shynaıy oıy. Búgin de Prezıdent bólek toqtalyp, erekshe jylýlyqpen ustazdardy qorǵaý týraly aıtty, — dedi depýtat Quryltaı kýlýarynda.
A. Aımaǵambetov buryn tek qana qaǵazbastylyq týraly aıtylsa, qazir oǵan qosymsha túrli aqparattyq júıeler paıda bolǵanyn atap ótti.
Ony ıntegratsııa arqyly basqa memlekettik organdardan jınaýdyń ornyna sol pedagogterge, sol synyp jetekshilerge, sol muǵalimderge tapsyrma berilip, jeke derekter jınalyp jatyr.
— Ustazdar sabaq bere me álde jeke derek jınap, ata-anadan sóz estı me? Prezıdent búgin osy máseleni kóterdi. Endi Quryltaı depýtattary bastamasymen ázirlengen jańa zań jobasynda da bul másele qamtylady. Ekinshiden, Memleket basshysy muǵalimderge dóreki sóıleý, olardyń qadir-qasıeti jóninde de óz oıyn aıtty. Munyń barlyǵy — muǵalimderimizge degen qamqorlyq, — dedi Ashat Aımaǵambetov.
Búgin Prezıdent Qasym-Jomart Toqaev óz Joldaýynda ustazdyń bilim berýine kedergi keltiretin basy artyq jumystardy doǵarý keregin aıtqan edi.
