Prezıdent Amerıkanyń bıznes ókilderimen ótken «dóńgelek ústel» otyrysynda sóz sóıledi

NЬıÝ-IORK. KAZINFORM — Qasym-Jomart Toqaevtyń Nıý-Iorktegi jumys sapary AQSh-tyń iri bıznes ókilderiniń qatysýymen ótken «dóńgelek ústel» otyrysynda jalǵasty, dep habarlaıdy Aqordanyń baspasóz qyzmeti.

Memleket basshysy Qazaqstan men AQSh-tyń keńeıtilgen strategııalyq seriktestigi qarqyndy túrde damyp kele jatqanyna nazar aýdardy.

– Biz Amerıkany mańyzdy seriktesterimizdiń biri sanaımyz jáne san qyrly yntymaqtastyqty odan ári damytýǵa múddeli ekenimizdi rastaımyz. Amerıka Qurama Shtattarynyń da osy strategııalyq ustanymdy qoldaıtyny qýantady. Oǵan Prezıdent Donald Tramppen 2024 jyly jeltoqsan aıynda bolǵan áńgimelesý barysynda kóz jetkizdik. Búgin biz Prezıdent Tramppen taǵy da mazmundy áńgime júrgizdik. Ol úshin rızashylyǵymdy bildiremin. Qazaqstan Prezıdent Tramptyń pragmatıkalyq dıplomatııany alǵa tartýyn, Eýropa men Taıaý Shyǵystan bastap Azııa men Afrıkaǵa deıingi qaqtyǵystardy beıbit jolmen retteýge yqpal etý isindegi rólin joǵary baǵalaıdy. Onyń konstrýktıvti pozıtsııasy men naqty nátıjege qol jetkizýge aıryqsha mán berýi jahandaǵy jiktelý ýshyqqan kezeńde shıelenistiń báseńdep, dıalogtyń artýyna yqpal etýde. Maqsat-mindeti aıqyn mundaı batyl ári tabandy áreket halyqaralyq deńgeıde moıyndaýǵa laıyq. Bizdiń oıymyzsha, bul ustanymdar erteń ótetin BUU-nyń Jalpy debatynda Uıymǵa múshe memleketterdiń nazaryna usynylýy kerek. Qurama Shtattar Qazaqstan ekonomıkasyna 100 mıllıard dollardan astam qarjy quıǵan iri ınvestor sanalady. Eki el ekonomıkalyq yqpaldastyqta zor jetistikke jetti. Biz muny maqtan tutamyz. Qazir elimizde 630-dan astam amerıkalyq kompanııa tabysty jumys istep jatyr. Olardyń qatarynda Chevron, ExxonMobil, Boeing, Visa, Mastercard, Meta, Wabtec, Citibank sekildi tanymal brendter bar, – dedi Prezıdent.

Otyrysta AQSh Saýda palatasynyń prezıdenti Sıýzann Klark, Chevron kompanııasy dırektorlar keńesiniń tóraǵasy Maıkl Ýırt, AQSh Saýda mınıstriniń orynbasary Ýılıam Kımmıt, AQSh Memlekettik hatshysynyń ekonomıkalyq ósim, energetıka jáne qorshaǵan orta máseleleri jónindegi orynbasarynyń mindetin atqarýshy Tomas Lersten, NVIDIA kompanııasynyń jasandy ıntellekt salasyndaǵy jahandyq bastamalar boıynsha vıtse-prezıdenti Kalısta Redmond, Boston Consulting Group kompanııasynyń dırektorlar keńesiniń jahandyq tóraǵasy Rıchard Lesser, S&P Global kompanııasynyń táýelsiz reıtıngter jáne kópjaqty qarjy ınstıtýttary reıtıngteri jónindegi jahandyq baǵytynyń basshysy, basqarýshy dırektory Roberto Sıfon-Arevalo, ExxonMobil Upstream Company prezıdenti Den Amman, LanzaJet kompanııasynyń bas atqarýshy dırektory Djımmı Samartsıs, The Boeing kompanııasynyń vıtse-prezıdenti Lendon Lýmıs, Ashmore Group kompanııasynyń bas atqarýshy dırektory Mark Kýmbs, Visa kompanııasy tóraǵasynyń orynbasary ári personal jáne korporatıvtik máseleler jónindegi bas dırektory Kellı Týle, Ivanhoe Mines Ltd. negizin qalaýshy ári dırektorlar keńesiniń atqarýshy teńtóraǵasy Robert Frıdland, Kolorad taý-ken isi mektebiniń prezıdenti Pol Djonson, GTM, OpenAI bilim berý jáne memlekettik baǵdarlamalar baǵyty boıynsha jetekshisi Kevın Mılls, Mastercard kompanııasynyń bas ákimshilik dırektory Rıchard Verma, Shell USA kompanııasynyń prezıdenti Kolett Herstıýs, Honeywell Process Automation kompanııasynyń prezıdenti jáne atqarýshy dırektory Djeıms Masso, Amazon Kuiper kompanııasynyń jahandyq tutyný baǵytynyń jetekshisi Lıza Skalpone sóz sóıledi.

Aıta keteıik, keshe Prezıdent Qasym-Jomart Toqaevtyń Nıý-Iorkke jumys sapary bastaldy.

Memleket basshysy BUU Bas Assambleıasynyń mereıtoılyq 80-shi sessııasy aıasyndaǵy Jalpy debatta sóz sóıleıdi.

Keshe Prezıdenttiń Nıý-Iork qalasyndaǵy jumys sapary kanadalyq transulttyq kompanııanyń basshysymen kezdesýden bastaý aldy.

Toqaev AQSh-ta qazaq mádenıetin dáriptep júrgen Smıtson ınstıtýtyna alǵys aıtty.

Búgin Memleket basshysy AQSh Saýda mınıstrimen kezdesti. Sonymen qatar Qasym-Jomart Toqaev Donald Tramppen sóılesti.

AQSh prezıdenti Donald Tramp Qazaqstannyń Memleket basshysyn tarıhı kelisimmen quttyqtady.