Prezıdent Amazon kompanııasynyń aǵa vıtse-prezıdenti Devıd Zapolskıdi qabyldady
NЬıÝ-IORK. KAZINFORM — Qasym-Jomart Toqaev pen Amazon kompanııasynyń aǵa vıtse-prezıdenti, jahandyq jáne quqyqtyq máseleler jónindegi bas dırektory Devıd Zapolskı tsıfrlandyrý, baılanys jáne jasandy ıntellekt salalaryndaǵy yntymaqtastyqtyń jaı-japsaryn talqylady. Bul týraly Aqordanyń baspasóz qyzmeti habarlady.
Prezıdent Amazon kompanııasynyń elimizdiń Jasandy ıntellekt jáne tsıfrlyq damý mınıstrligimen, sondaı-aq «Qazaqtelekom» kompanııasymen birlesken jobalardy júzege asyrý josparyna qoldaý bildirdi.
Yntymaqtastyq Qazaqstan aýmaǵyndaǵy jyldamdyǵy joǵary ınternetti qamtamasyz etý jáne kıberqaýipsizdikti nyǵaıtý sekildi strategııalyq mańyzdy baǵyttardy qamtıdy.
Amazon tek elimizge qatysty jobalardy júzege asyrýmen shektelmeı, Qazaqstandy spýtnıktik baılanystyń óńirlik habyn qalyptastyrýǵa bolatyn alań retinde qarastyryp otyr.
Qazaqstan Prezıdentiniń Nıý-Iorkke jumys sapary aıasynda «Qazaqtelekom» jáne Amazon Kuiper kompanııalary Kuiper spýtnık jelisiniń qyzmet kórsetýine qatysty dıstrıbıýtorlyq kelisimge qol qoıdy.
Soǵan saı Amazon Kuiper kompanııasy Almaty, Aqkól jáne Aqtaý qalalarynda óziniń jerdegi ınfraqurylymyn jasaqtaýdy kózdeıdi. Bul jobaǵa 200 mıllıon dollarǵa jýyq ınvestıtsııa salý josparlanǵan.
Atalǵan bastama Memleket basshysynyń tsıfrlyq ınfraqurylymdy damytý jáne elimizdiń barlyq óńiri úshin zamanaýı telekommýnıkatsııa qyzmetine teńdeı qol jetkizý tapsyrmasyn oryndaý aıasynda iske asyrylady.
Amazon kompanııasynyń aǵa vıtse-prezıdenti Devıd Zapolskı Qazaqstandy jyldamdyǵy joǵary jáne arzan ınternetpen qamtamasyz etetinin aıtty.
— Kóp raqmet, Prezıdent myrza! Sizben kezdesý biz úshin úlken mártebe. Búkil komandamyz Sizben kezdeskenimizge qýanyshtymyz. Elińizdiń Úkimetimen jáne «Qazaqtelekom» kompanııasymen osy kelisimge qol jetkizý jolynda eńbek etken barlyq azamattarǵa alǵys aıtamyn. Sizdiń tsıfrlyq tehnologııalardy engizý bastamańyzdy qýattaımyz. Bul bizdiń Ortalyq Azııadaǵy alǵashqy iri jáne eń mańyzdy jobamyz. Muny maqtan tutamyz. «Qazaqtelekom» kompanııasymen birge turǵyndardy jyldamdyǵy joǵary jáne arzan ınternetpen qamtamasyz etemiz. Atalǵan jobany ilgeriletýge yqylastymyz, — dedi ol.
Aıta ketelik Prezıdent PepsiCo qory dırektorlar keńesiniń tóraǵasy Stıven Kıhony qabyldaǵan edi.