Prezıdent: AMANAT partııasynyń «Ádiletke» qosylýy – tarıhı sheshim
ASTANA. KAZINFORM – Memleket basshysy Qasym-Jomart Toqaev Parlament palatalarynyń birlesken otyrysynda barlyq ozyq ári jasampaz kúshter jalpyulttyq qundylyqtar men ortaq maqsattarǵa birigip jatqanyn málimdedi.
– Búgin men AMANAT partııasynyń fraktsııasyna jáne barlyq múshelerine belsendi, baısaldy jáne jasampaz ustanymdary úshin alǵys aıtamyn. Sizder shynaıy otanshyldyq pen azamattyq jaýapkershiliktiń ozyq úlgisin kórsetip kelesizder.
Saıası uıymnyń taıaýda ótken sezinde «Ádilet» partııasyna qosylý týraly strategııalyq sheshim qabyldandy. Men bul tarıhı sheshimdi qoldaımyn.
Búgingi tańda barlyq ozyq ári jasampaz kúshter jalpyulttyq qundylyqtar men ortaq maqsattarǵa birigý ústinde. Mundaı qadam elimizde qolǵa alynyp jatqan túbegeıli reformalarǵa tyń serpin bereri sózsiz.
Túptep kelgende, barshamyzdyń muratymyz – bir. Bul – jas urpaqtyń jarqyn bolashaǵyna jol ashatyn órkenıetti ári ozyq memleket qurý.
Bizdiń Qazaqstannan basqa Otanymyz joq. Elimizdiń oıdaǵydaı damýy bizge ǵana kerek, – dedi Prezıdent.
Onyń sózinshe, ult bolyp uıysyp, jurt bolyp jumyla bilse, elimiz kez kelgen belesti baǵyndyryp, kózdegen maqsattyń bárine qol jetkizedi.
– Qasterli Táýelsizdigimizdiń tuǵyryn nyǵaıtyp, Ádiletti, Qýatty, Qaýipsiz, Taza ári Ozyq Qazaqstandy quramyz. Men buǵan kámil senemin! Osy jolda aıanbaı eńbek etý – ár azamattyń perzenttik paryzy. Elimiz aman, jurtymyz tynysh, birligimiz bekem bolsyn! Qazaq eli máńgi jasasyn! – dep jalyndy sózdermen túıindedi Prezıdent.
Aıta keteıik, buǵan deıin dombyra qundylyǵymyz retinde ultymyzdy álemge tanytatyn biregeı brendke aınalýy kerek degen Prezıdent málimdemesin jarııalaǵanbyz.
