Prezıdent «ALJIR» saıası qýǵyn-súrgin jáne totalıtarızm qurbandarynyń memorıaldy-murajaı keshenine bardy
ASTANA. KAZINFORM – Búgin Saıası qýǵyn-súrgin jáne asharshylyq qurbandaryn eske alý kúni.
Osyǵan oraı Prezıdent Qasym-Jomart Toqaev «ALJIR» saıası qýǵyn-súrgin jáne totalıtarızm qurbandarynyń memorıaldy-murajaı keshenine baryp, gúl shoǵyn qoıdy.
Memleket basshysy bozdaqtardyń rýhyna taǵzym etip, bir mınýt únsizdikpen eske aldy.
Aıta ketelik qýǵyn-súrginge ushyraǵan qazaqtyń ereksheligi — jan sanynyń 40 paıyzynan aıyrylýy, ulttyń betke ustar tulǵalarynyń qýǵyndalýy. Qanquıly zamanda Álıhan Bókeıhanov, Ahmet Baıtursynov, Maǵjan Jumabaev, Turar Rysqulov, Beıimbet Maılın, Іlııas Jansúgirov, Sáken Seıfýllın, Sanjar Asfendııarov, Halel Dosmuhanbetov sekildi qaıratkerler oqqa ushty. Saıası ǵylymdar doktory, alashtanýshy Ábdijálel Bákirdiń pikirinshe, Keńes úkimetine zııalylardy abaqtyǵa toǵytý qıynǵa soqpaǵan. Kez kelgen pikir men ustanymnan qylmys kórip, erkin oıly azamattardy janshýǵa tyrysty.