Prezıdent Altynaı Asylmuratovany mereıtoıymen quttyqtady

ASTANA. KAZINFORM — Memleket basshysy Altynaı Asylmuratovany mereıtoıymen quttyqtady. Bul týraly Mádenıet jáne aqparat mınıstrliginiń baspasóz qyzmeti habarlady. 

Qazaqstan Respýblıkasy Premer-mınıstriniń orynbasary — mádenıet jáne aqparat mınıstri Aıda Balaeva Memleket basshysynyń atynan balet ártisi, Qazaq ulttyq horeografııa akademııasynyń jáne «Astana Opera» opera jáne balet teatrynyń kórkemdik jetekshisi Altynaı Asylmuratovany mereıtoıymen quttyqtap, estelik syılyq tabystady.

Qasym-Jomart Toqaevtyń quttyqtaý hatynda onyń álemdik jáne otandyq balet ónerin damytýǵa qosqan zor úlesi, tálimgerlik joly men kórkemdik jetekshi retindegi kásıbiligi atap ótilgen.

— Balet óneriniń talantty ári tanymal ókili retinde Siz talaı shyǵarmashylyq belesterdi baǵyndyryp, álemniń jetekshi sahnalarynda óner kórsettińiz. Kásibı sheberligińiz, tabıǵı bolmysyńyz ben eńbekqorlyǵyńyzdyń arqasynda kórermen qaýymnyń zor mahabbaty men súıispenshiligine bólenip júrsiz. Kórkemdik jetekshi ári tálimger retinde Siz Qazaqstandaǵy balet óneriniń damýyna zor úles qosyp kelesiz. Sizdiń horeografııalyq qoıylymdaryńyz túrli kóńil-kúı syılap, adamı qundylyqtardy nasıhattaıdy, sondyqtan eldiń mádenı ómirinde aıryqsha oryn alady, — delingen Prezıdent quttyqtaýynda.

Altynaı Asylmuratova — álemdik balette óz orny bar kásibı maman. Ol ózindik erekshe ónerimen Marıın teatrynan bastap, Koroldik opera teatry Covent Garden, Parıj operasyna deıingi álemniń jetekshi teatrlarynyń sahnasynda kórermendi tánti etti.

Búginde ol kórkemdik-jetekshilik ári ustazdyq qyzmetin belsendi túrde jalǵastyryp, qazaqstandyq balet mektebiniń damýyna jáne kásibı horeografııalyq bilim berý júıesiniń qalyptasýyna yqpal etip, daryndy jas ártisterdi tárbıelep keledi.

Aıta ketelik «Astana Balet» teatry kórermenge qysqy maýsymdaǵy repertýaryn usynǵan edi.