Prezıdent: Altyn Ordanyń tarıhyn tek áskerı-saıası turǵydan baǵalaýdan aýlaq bolý kerek
ASTANA. KAZINFORM — Altyn Ordanyń tarıhyn tek áskerı-saıası turǵydan baǵalaýdan aýlaq bolyp, onyń rólin jańasha paıymdaý kerek. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Árıne, men usynǵan zertteý baǵyttarymen shektelip qalýǵa bolmaıdy. Men sizder sekildi kóne dáýirdi zerttep júrgen tarıhshy-ǵalym emespin. Qazirgi tańda Altyn Ordanyń tarıhyn tek áskerı-saıası turǵydan baǵalaýdan aýlaq bolyp, onyń rólin jańasha paıymdaý kerek. Bul — osy baǵyttaǵy izdenisterdiń aıasyn keńeıtýge septigin tıgizetin baǵdar ǵana, — dedi Qasym-Jomart Toqaev.
Osy oraıda Prezıdent Joshy Ulysynyń mol zııatkerlik jáne rýhanı dástúri, tıimdi basqarý ınstıtýttary men damyǵan ekonomıkasy bolǵanyn eske saldy.
— Osy alyp órkenıettiń qyr-syryn tolyq ashý mańyzdy. Bul ótkendi ǵylymı turǵydan qaıta zerdeleý, sondaı-aq, Ortalyq Eýrazııa halyqtarynyń memlekettilik bastaýyn, biregeıligin jáne ortaq tarıhyn tereń túsiný úshin qajet, — dedi Memleket basshysy.
Prezıdent Altyn Orda sol kezeńdegi kóptegen memleketke qaraǵanda óz damýynda strategııalyq ashyqtyq qaǵıdatyna berik bolǵanyna nazar aýdartty.
