Prezıdent: Altyn Orda jylnamasy — adamzatqa ortaq tarıh
ASTANA. KAZINFORM — Altyn Orda jylnamasy — adamzatqa ortaq tarıh. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Sımpozıým Altyn Orda men Uly dala tarıhyn zerdeleıtin túrli mektep ókilderiniń basyn qosyp otyr. Bul — óte mańyzdy. Uzaq jyldar boıy osy irgeli taqyrypty indete zerttegen reseılik ǵalymdardyń rólin atap ótken ádiletti bolar edi. Olar Altyn Ordanyń tynys-tirshiligin jan-jaqty sıpattaıtyn ǵylymnyń mol qoryn jınady. Sonymen qatar Altyn Orda taqyryby bir ǵana memlekettiń sheńberinde shektelip qalmaı, Qytaı, Mońǵolııa, AQSh, Úndistan, Pákistan, Japonııa, Qyrǵyzstan, Ózbekstan, Mysyr jáne birqatar Eýropa elderi zertteýshileriniń nazaryn aýdaryp, búkil álemdi sharlap ketti desek bolady. Túptep kelgende, Altyn Orda jylnamasy — adamzatqa ortaq tarıh, — dedi Prezıdent.
Memleket basshysy búgin ótip jatqan biregeı sımpozıým álemdik aýqymdaǵy murany júıeli zertteý jumysyn jańa sapalyq deńgeıge kóteredi dep senetindigin aıtty.
— Osy jerde otyrǵan ǵalymdar men sarapshylar bul mindetti iske asyrýǵa eleýli úles qosýda. Bul mańyzdy jumysta sizder oń nátıjege qol jetkizesizder dep senemin, — dedi Qasym-Jomart Toqaev.
