Prezıdent almatylyqtardy Botanıkalyq baqqa uqypty qaraýǵa shaqyrdy
ALMATY. QazAqparat - Qazaqstan Prezıdenti Qasym-Jomart Toqaev Almatyǵa jumys sapary barysynda Botanıkalyq baqty aralady, dep habarlaıdy QazAqparat tilshisi.
Memleket basshysy botanıkalyq baqty qaıta qurýdyń nátıjelerimen tanysty. Nysandy qaıta qalpyna keltirýdi 2018 jyly Botanıka jáne fıtoıntrodýktsııa ınstıtýtynyń suraýy boıynsha «B.Ótemuratov qory» bastaǵan bolatyn. Basty maqsat – botanıkalyq baqty onyń aýmaǵynyń tutastyǵy men ózindik erekshelikterin saqtaı otyryp, ınfraqurylymyn jańǵyrtyp, jasyl jelek qoryn kóbeıtý bolatyn.
QR Prezıdenti Qasym-Jomart Toqaev bul bastamaǵa joǵary baǵa berdi.
«Osy baǵytta ákimdik pen Bolat Ótemuratov qory birlesip óte úlken, eń bastysy, mańyzdy jumys atqardy dep oılaımyn. Almatylyqtardy osy terrıtorııany saqtap, óz úıin uqypty ustaǵandaı ıe bolýǵa shaqyramyn jáne Botanıkalyq baq burynǵy kezeńderdegideı almatylyqtardyń eń jaqsy kóretin oryndarynyń biri bolady degen oıdamyn», - dedi Qasym-Jomart Toqaev.
Qaıyrymdylyq qorynyń quryltaıshysy Bolat Ótemuratov Memleket basshysyna joǵary baǵa bergeni úshin alǵysyn bildirdi.
«Bul jobany iske asyrýǵa biz tek baqtyń jasyl jelek qoryn saqtap qalyp qoımaı, sonymen qatar ony kóbeıtý, jańa kollektsııalarmen baıytý úshin barynsha jaýapkershilikpen qaradyq. Aıalap qalpyna keltirý jáne aldyńǵy qatarly tehnologııalardy paıdalaný – biz basshylyqqa alǵan negizgi eki prıntsıp. Biz qalaǵa ózimizdiń syıymyz – jańǵyrtylǵan botanıkalyq baq – almatylyqtardyń kóńilinen shyǵý úshin bar kúshimizdi saldyq, múmkin bolǵannyń bárin istedik. Bul bizdiń qalaǵa degen syılyǵymyz, ony biz rııasyz tabystap otyrmyz – baq memlekettiń menshiginde qalyp otyr jáne ǵylymı qyzmetin jalǵastyrady», - dedi Bolat Ótemuratov.
Bul jumystarǵa 15 mln AQSh dollary jumsaldy. Jobany iske asyrýǵa «Vernyı Kapıtal» kompanııalar tobynyń úzdik basqarýshylary qatysty.
Qaıta qurý tujyrymdamasy men keńistikti damytý jospary 2018 jyldyń jazynda qoǵamdyq tyńdaýlarda jurtshylyqqa usynylǵan bolatyn. Tyńdaýǵa qatysýshylardyń usynystary men tilekterin eskere otyryp, 2018 jyly kúzde qaıta qurýdyń eskız jobasy usynyldy. Tórt ret BAQ, qoǵamdyq jáne ekologııalyq belsendilerdiń qatysýymen baspasóz týry ótkizildi. Ótken jyly, qurylys jumystary bastalardyń aldynda, jobanyń jekelegen quraýysh bólikteriniń qorshaǵan ortaǵa áserin baǵalaý boıynsha birneshe satyda qoǵamdyq tyńdaý ótkizildi.
Eske sala ketsek, Botanıkalyq baqtyń qalaı ózgergeni týraly buǵan deıin jazǵan bolatynbyz.
