Prezıdent Almatydaǵy tabıǵı apattardy eskertý júıesin jetildirýdi tapsyrdy

ALMATY. QazAqparat – Memleket basshysy Qasym-Jomart Toqaevtyń Almaty qalasy jurtshylyǵymen kezdesýi kezinde tabıǵı apattardy eskertý júıesin jetildirýdi tapsyrdy, dep habarlaıdy QazAqparat.

Prezıdent Almatyda bolýy múmkin jer silkinisin dál boljaý jáne erterek eskertý óte mańyzdy ekenin aıta kele, 2025 jylǵa qaraı 28 seısmıkalyq stantsııany ornatýdy aıaqtaýdy, keıinnen olardy Qyrǵyzstannyń erte habarlaý júıesimen biriktirýdi tapsyrdy. Sonymen qatar, qalada tótenshe jaǵdaılar týraly dybystyq habarlamalardy jiberý múmkindigi bar biriktirilgen eskertý júıeleriniń jumysyn júrgizý júkteldi. Osy oraıda ákimdik sıtýatsııalyq ortalyqtyń qyzmetin tolyq iske qosýy kerek.

«Ortalyq beınebaqylaý, joldaǵy trafıkten, qońyraý shalý belsendiliginen jáne áleýmettik ınfraqurylym júıelerinen alynǵan derekterdi biriktirýi kerek», - dedi Qasym-Jomart Toqaev.

Memleket basshysy bıyl qyrkúıek aıyndaǵy Joldaýynda Árbir qalanyń jer telimderi men kommýnaldyq jelilerdiń shemasy kórsetilgen fýnktsıonaldy ınteraktıvti kartasyn jasaýdy tapsyrǵanyn eske saldy.

Almatyda bul tapsyrma tsıfrlyq tehnologııalardy damytý aıasynda jáne qalanyń Bas josparyn túzetý aıasynda júzege asyrylyp jatyr.

«Búgin júktelgen tapsyrmalar men jobalar birinshi kezekte qala turǵyndarynyń ómir súrý sapasyn jaqsartýǵa, ekonomıkalyq áleýetin nyǵaıtýǵa jáne qalanyń tartymdylyǵyn arttyrýǵa baǵyttalǵan. Bul tapsyrmalardyń oryndalýy meniń erekshe baqylaýymda bolady», - dedi Prezıdent.

Budan buryn habarlanǵandaı, Memleket basshysy Almatyda metropolıten jelisin keńeıtýdi jalǵastyrý qajet ekenin aıtty.

Sonymen qatar Almaty joldaryna qatysty ákimdikke tapsyrma júkteldi.