Prezıdent Almaty oblysyndaǵy ustazyn merekesimen quttyqtady
TALDYQORǴAN. QazAqparat – Prezıdent Almaty oblysynyń Qaratal aýdany Úshtóbe qalasyndaǵy mekteptiń ardager ustazy Valentına Spırıdonovaǵa 8 naýryz merekesine oraı quttyqtaý hat joldady, dep habarlaıdy QazAqparat.
QR Prezıdenti Qasym-Jomart Toqaevtyń joldaǵan quttyqtaý hatyn Almaty oblysynyń ákimi Amandyq Batalov Úshtóbedegi Kemel Toqaev atyndaǵy mektepke baryp, ardager ustaz, K.Toqaev atyndaǵy qaıyrymdylyq qorynyń qorǵanshylyq keńesiniń tóraıymy Valentına Spırıdonovaǵa jetkizdi.
«Memleket basshysy Qasym-Jomart Toqaev Sizge quttyqtaý hatyn joldap, óz atynan 8 naýryz merekesimen quttyqtaýymdy tapsyrdy. Sizdi kóktemniń keremet merekesi qarsańynda kórgenime jáne quttyqtaýdy ózińizge jetkizip otyrǵanyma qýanyshtymyn», - degen A. Batalov quttyqtaý hattyń mátinin oqyp berdi.
«Qurmetti Valentına Grıgorevna! Sizdi Halyqaralyq áıelder kúnimen quttyqtaımyn. Osy bir kóktemniń kórikti de shýaqty kúninde qaıyrymdylyǵyńyz, túsinistigińiz jáne jemisti eńbegińiz úshin shyn júrekten alǵys aıtamyn. Árbir atqan tań Sizge jáne sizdiń jaqyndaryńyzǵa meıirim, súıispenshilik pen jan jylýyn syılasyn. Sizge Zor densaýlyq, mol baqyt tileımin!», - delingen quttyqtaýda.
Ózine kórsetilgen qurmet úshin rızashylyq bildirgen bilim salasynyń ardageri Valentına Spırıdonova:
«Ýaqytynyń tyǵyz bolǵanyna qaramastan, ustazyn, týǵan mektebin umytpaıtyn Qazaqstan Respýblıkasynyń Prezıdentine zor alǵysymdy aıtamyn. Men búkil ómirin jastardy tárbıeleýge arnaǵan aýyl muǵalimimin. Prezıdentimiz Qasym-Jomart Toqaevtyń meni umytpaǵanyna qýanyshtymyn. Adamgershilik turǵysynan sheksiz rızashylyǵymdy bildiremin. Qazaqstanymyz kórkeıip, gúldene bersin», - dedi, sonymen qatar oblys basshylyǵyna da alǵysyn aıtyp, Jetisý óńiriniń ósip-órkenýine tilektestigin bildirdi.
Valentına Grıgorevna qor jumysy jaıly da aıtyp berdi. Onyń aıtýynsha, qor 50 balaǵa otandyq jáne sheteldik joǵary bilim oryndarynda oqýlary úshin grant bólgen, oqý ozattary aı saıyn stıpendııa alyp turady. Mekteptiń birinshi synyp oqýshylary jyl saıyn qajetti oqý quraldarymen qamtamasyz etiledi. Qor kóp balaly jáne az qamtylǵan otbasylary únemi qoldaý kórsetedi. Máselen, indet kezinde qor qarjysy esebinen mektep oqýshylaryna qashyqtan oqýlary úshin 50 smartfon satyp alyp berilgen. Sonymen qatar qor Otan soǵysy ardagerlerin, tyl eńbekkerlerin, soǵys urpaqtaryn esten shyǵarmaı, olarǵa da qajetti kómekterin kórsetip turady.
Taǵy bir atap óterligi, mektep aýmaǵynda aýdan jastaryn jańa jáne qajetti mamandyqtarǵa oqytatyn 100 oryndyq kolledj ben 30 oryndyq jataqhana salynady.
Spırıdonova Valentına Grıgorevna bilim berý salasynda 1963 jyldan beri eńbek etedi. 1995-2009 jyldary Kemel Toqaev atyndaǵy mekteptiń dırektory boldy. 2009 jyldan bastap Kemel Toqaev atyndaǵy qaıyrymdylyq qoryn basqarady. Kásibı jetistikteri úshin «Qazaqstan Respýblıkasynyń bilim berý salasynyń úzdigi», «QR Bilim berý salasynyń Qurmetti qyzmetkeri», «Ybyraı Altynsarın», «Altyn barys» tósbelgilerimen, QR Prezıdentiniń, QR Bilim jáne ǵylym mınıstrliginiń, oblys ákiminiń Alǵys hattarymen, «Shapaǵat» medalimen jáne basqa da birqatar merekelik medeldarmen, gramotalarmen jáne alǵys hattarmen marapattalǵan.
