Prezıdent Almatyda Footlab ortalyǵynda kishkentaı fýtbolshylarmen kezdesti
ALMATY. KAZINFORM — Prezıdenttiń Almaty qalasyna jumys sapary Footlab fýtbol ortalyǵynyń qyzmetimen tanysýdan bastaldy.
Qasym-Jomart Toqaevqa jańa ortalyqtyń pılottyq rejımde jumys isteı bastaǵany týraly málimet berildi.
Munda qazir joǵary bilikti 8 bapker 50 balany jattyqtyryp jatyr. «Smart Football» jaýapkershiligi shekteýli seriktestiginiń quryltaıshysy Murat Medeýovtiń aıtýynsha, fýtbol akademııasynda 5 jastan 12 jasqa deıingi 1000-ǵa jýyq balany jattyqtyrý josparlanǵan.
Footlab — sportsúıer qaýymǵa, otbasylyq demalysqa, balalar men eresekter arasynda týrnırler ótkizýge arnalǵan ınteraktıvti fýtbol alańy.
Almatydaǵy Footlab ortalyǵy Portýgalııanyń franshızasyn alǵan. Onyń bas keńsesi Lıssabonda ornalasqan. Atalǵan jobany tanymal portýgal fýtbolshylary Rýı Koshta men Krıshtıaný Ronaldý 7EGEND ınnovatsııalyq kompanııasymen birlesip jasaǵan.
Búginde Footlab franshızasy álemniń 60-tanastam eline satylǵan. Bul ortalyq Lıssabon men Dýbaıdan keıin úshinshi bolyp, Almatyda ashyldy. Jobaǵa 1,5 mıllıard teńgeden astam jeke ınvestıtsııa salynǵan.
Ortalyqtyń bıyl 50 myńnan astam adam qabyldaý, sondaı-aq sport pen salaýatty ómir saltyn nasıhattaý úshin Almaty qalasynyń oqýshylary arasynda týrnır ótkizý jospary bar.
Investorlar elimizdiń barlyq óńirinde osyndaı ortalyqtar jelisin ashýdy kózdep otyr.
Prezıdent balalarǵa arnalǵan sport jobasyn damytý úshin jaýapty organdarǵa jer telimin bólý máselesinde járdem kórsetýdi tapsyrdy jáne Astanada osyndaı fýtbol ortalyǵyn salý týraly bastamany qoldady.
Qasym-Jomart Toqaev jas fýtbolshylarǵa tabys tilep, sport jeıdesine qoltańbasyn qaldyrdy.
