Prezıdent Almatyda BUU ýnıversıtetiniń óńirlik fılıalyn qurýdy usyndy

ASTANA. KAZINFORM – Memleket basshysy Qazaqstannyń halyqaralyq arenadaǵy abyroıy el ishindegi jetistikterimen tikeleı baılanysty ekenin málimdedi. Bul týraly Aqordanyń baspasóz qyzmeti habarlady.

Prezıdenttiń paıymdaýynsha, tıimdi dıplomatııanyń ózeginde dál osy jaýapty ishki saıasat jatyr.

– Men bilimniń jáne halyqaralyq deńgeıdegi akademııalyq yqpaldastyqtyń damýyna aıryqsha mán beremin. Ásirese, álemniń ózgerýin jedeldetetin bastamalardy qoldaımyn. Bul basymdyqtar BUU ýnıversıtetiniń mıssııasyna tolyq saı keledi. Bıyl Qazaqstanda Ortalyq Azııa jáne Aýǵanstanǵa arnalǵan BUU ornyqty damý ortalyǵy ashyldy. Qazaqstan osy alańnyń negizinde Almatyda BUU ýnıversıtetiniń óńirlik fılıalyn qurýǵa ázir. Onyń qyzmetin, eń aldymen, sý jáne klımat qaýipsizdigi, qaqtyǵystardy retteý, bitimgerlik, ornyqty damý men jasandy ıntellektini basqarý máselelerine baǵyttaýǵa bolady, – dedi Qasym-Jomart Toqaev.

Memleket basshysy sózin qorytyndylaı kele, Qazaqstannyń BUU ýnıversıteti men elimizdegi jetekshi joǵary oqý oryndary arasynda birlesken zertteý júrgizý, akademııalyq tájirıbe almasý jáne maman daıarlaý boıynsha ınstıtýtsıonaldyq seriktestikti odan ári nyǵaıtýǵa múddeli ekenin jetkizdi. 

Birikken Ulttar Uıymynyń ýnıversıteti – BUU Bas Assambleıasy qurǵan jahandyq zertteý jáne bilim berý ortalyǵy. Shtab-páteri Tokıoda ornalasqan ýnıversıtet quramyna álemniń 12 elindegi 13 ınstıtýt kiredi.

Aıta keteıik, Qazaqstan Prezıdenti BUU ýnıversıtetinde dáris oqydy.