Prezıdent Almaty oblysynyń ákimi Marat Sultanǵazıevti qabyldady

ASTANA. KAZINFORM — Marat Sultanǵazıev oblystyń bıylǵy qańtar-mamyr aılaryndaǵy negizgi áleýmettik-ekonomıkalyq damý kórsetkishteri týraly baıandady.

Jalpy óńirlik ónim kólemi 5 trıllıon teńgege jetken oblys elimiz boıynsha besinshi orynda tur.

Qańtar-mamyr aılaryndaǵy qysqa merzimdik ekonomıkalyq kórsetkish 107,9 paıyzdy quraǵan.

Ónerkásiptiń jalpy kólemi jóninen óńdeý ónerkásibi (88,5%) jetekshi orynǵa ıe.

Aýyl sharýashylyǵy, baılanys qyzmeti, kólik, qurylys salalarynda jáne saýda-sattyq sektorynda da aıtarlyqtaı ósim qarqyny baıqalatynyn aıtty.

Oblys aýmaǵynda 7 ındýstrııalyq aımaq qurylyp jatqany jóninde baıandaldy. Óńirdiń 2030 jylǵa deıingi ınvestıtsııalyq portfeline jalpy quny 3,7 trıllıon teńge bolatyn 207 joba engen.

Bıyl somasy 446,7 mıllıard teńge bolatyn 58 joba júzege asyrylyp, 5,3 myń jańa jumys orny ashylmaq.

Shaǵyn jáne orta bıznestiń damýy jóninde málimet berdi.

2024 jyldyń basyndaǵy derekke sáıkes óńirde 136,7 myń shaǵyn jáne orta bıznes sýbektisi jumys isteıdi. Bul byltyrǵy kórsetkishten 6,3 paıyzǵa kóp.

«Aýyl amanaty» baǵdarlamasy aıasynda 53 aýyl sharýashylyǵy kooperatıvi qurylǵan. Onyń 46-syna tıisti qarjylaı qoldaý kórsetilgen.

Óńirdegi áleýmettik máseleler, sonyń ishinde úsh aýysymdy mektepterdiń problemasy josparly túrde sheshilip jatqanyn aıtty.

Byltyr 13,8 myń oryndyq 13 mekteptiń qurylysy aıaqtalǵan.

2024-2025 jyldary «Jaıly mektep» ulttyq jobasy aıasynda taǵy da 53 mektep salý josparlanyp otyr.

Almaty oblysynda júrgizilgen «Taza Qazaqstan» ekologııalyq aktsııasynyń alǵashqy bes aptasynyń qorytyndysy tanystyryldy.

Oblys turǵyndary qoǵamdyq oryndardy abattandyrý jáne jappaı aǵash otyrǵyzý isine belsendi atsalysqan. Atalǵan shara aıasynda 19 506 tonna qoqys jınalyp, 6600 gektardan astam aýmaq tazartylǵan.

Memleket basshysy «Taza Qazaqstan» bastamasy ekologııalyq mádenıetti qalyptastyratyn mańyzdy qadam ekenin atap ótip, oblys ákimine atalǵan jumysty turaqty túrde júrgizýdi tapsyrdy.

Kezdesý barysynda oblys ortalyǵy Qonaevty, jańadan qurylǵan Alataý qalasyn jáne tutas aglomeratsııany damytý perspektıvasy talqylandy. Memleket basshysyna qala qurylysyna qatysty qujattamany ázirleý jáne bekitý jumystarynyń aralyq nátıjesi tanystyryldy.

Qasym-Jomart Toqaev oblystyń strategııalyq damý josparyn oryndaýǵa baǵyttalǵan jumystardy jalǵastyrýdy, sondaı-aq Alatau City jobasyn júzege asyrý úshin áleýetti ınvestorlarmen qarym-qatynasty jandandyrýdy tapsyrdy.