Prezıdent: Almaty – qazaq eliniń ǵana emes, túrki memleketteriniń de rýhanı ordasy
ASTANA. KAZINFORM – 18 tamyzda Almatyda Túrki memleketteri uıymynyń (TMU) IV Halyqaralyq jastar festıvaliniń resmı ashylý saltanaty ótti. Іs-shara barysynda qalaǵa «2025 jylǵy Túrki áleminiń Jastar astanasy» mártebesi berildi, dep habarlaıdy KAZINFORM QR Mádenıet jáne aqparat mınıstrliginiń baspasóz qyzmetine silteme jasap.
Festıvaldiń saltanatty ashylýyna Qazaqstan Respýblıkasynyń Mádenıet jáne aqparat mınıstri Aıda Balaeva qatysyp, Memleket basshysy Qasym-Jomart Toqaevtyń arnaıy quttyqtaý hatyn oqyp berdi.
– Almaty – azattyǵymyzdyń altyn besigi, jasampaz jastardyń qutty mekeni. Órkenıetimizdiń órisin keńeıtýge ólsheýsiz úles qosqan kóptegen uly tulǵalarymyz osy qalada ósip-óngen. Shyn máninde, tól mádenıetimizdiń temirqazyǵyna aınalǵan shejireli shahar qazaq eliniń ǵana emes, túrki memleketteriniń de rýhanı ordasy sanalady. Búgin asqaraly Alataýdyń baýraıynda túbi bir túrki jurtynyń bilimpaz, daryndy ári belsendi jastary bas qosyp otyr. Іrgeli is-shara aıasynda jańa dostar taýyp, tyń ıdeıalar men jobalardy júzege asyrasyzdar dep senemin. Órenderimizdiń birligi bekem bolsa, túrki áleminiń tuǵyry myǵym, bolashaǵy jarqyn bolary sózsiz. Qazaqstan baýyrlas halyqtardyń ıgi bastamalaryna únemi qoldaý kórsetip keledi. Biz elderimizdiń arasyndaǵy jan-jaqty yqpaldastyqty nyǵaıtýǵa aıryqsha mán beremiz. Astanada Dúnıejúzilik kóshpendiler oıyndarynyń ótýi, Aqtaýdyń Túrki áleminiń mádenı astanasy jáne Almatynyń Túrki jastarynyń astanasy atanýy – sonyń aıqyn dáleli, – delingen Prezıdenttiń quttyqtaýynda.
Aıda Balaeva Almatynyń mádenıet pen ǵylymnyń, bilim men ınnovatsııanyń toǵysqan ortalyǵy ekenin atap ótti. Onyń aıtýynsha, qala búginde túrki áleminiń jas kóshbasshylary men shyǵarmashyl ókilderi úshin jańa ıdeıalar men seriktestiktiń ordasyna aınalýda.
TMU Bas hatshysy Kýbanychbek Omýralıev te arnaıy qatysyp, mártebeli ataqty Lenkoran qalasynan Almatyǵa tabystaý – tarıhı sát ekenin aıtty.
– Búgin biz Túrki áleminiń Jastar astanasy ataǵyn Lenkoran qalasynan qarqyndy damyp kele jatqan Almaty qalasyna tabystaý sátiniń kýási bolyp otyrmyz. Bul qadam ortaq qundylyqtarymyzdyń sabaqtastyǵyn, sondaı-aq bolashaq Túrki álemin qalyptastyrýdaǵy jastardyń ósip kele jatqan rólin aıqyn kórsetedi. Almaty qalasyna bul mártebe TMU-ǵa múshe elderdiń Jastar jáne sport mınıstrleriniń VIII otyrysynyń sheshimi negizinde berilgen bolatyn. Qalanyń zamanaýı mádenı ómiri, belsendi bilim berý mekemeleri jáne yntaly jastary – Túrki áleminiń jańa býynynyń áleýetiniń jarqyn kórinisi, – dedi ol.
Almaty ákimi Darhan Satybaldy da jastarǵa arnaǵan sózinde bul mártebeniń senim men bolashaqqa degen ýádeni bildiretinin aıtty.
– Almaty – túrki elderiniń jastary bas qosatyn, ortaq murattar toǵysatyn, mádenıetimiz ben dástúrimiz jańǵyratyn úlken ortaǵa aınalýda. Bul mártebe – tek ataq emes, bolashaqqa degen senim. Túrki jastarynyń úni Almatydan estilip, ıdeıalary bastaý alyp, dostyǵy osy shaharda nyǵaısyn! Almaty – ortaq úıimiz, túrki jastarynyń shamshyraǵy ári bolashaqtyń ortalyǵy, – dedi ákim.
Saltanatty rásimde Ázerbaıjannyń Lenkoran qalasynyń ókilderi Almaty jastaryna «Jastar astanasy» kiltin tabystap, baýyrlastyq estafetasyn jalǵastyrdy. Abylaı alańynda ótken merekelik is-sharada qala turǵyndary men qonaqtaryna estrada juldyzdary men shyǵarmashylyq ujymdardyń qatysýymen kontsert usynyldy.
Festıval 19 tamyzǵa deıin jalǵasady. Túrki memleketteri uıymyna múshe elder – Qazaqstan, Ázerbaıjan, Qyrǵyzstan, Túrkııa jáne Ózbekstan delegattary jastar saıasaty, kásipkerlik, azamattyq belsendilik jáne áleýmettik bastamalardy damytý tájirıbelerimen bólisedi. Sondaı-aq jas kóshbasshylar men kásipkerlerdiń kezdesýi ótedi.
Aıta keteıik, Ankara 2026 jyly túrki áleminiń týrızm astanasy bolady.