Prezıdent Almaty qalasynyń ákimdigine bardy
ASTANA. KAZINFORM – Memleket basshysy Almaty qalasyna jumys sapary barysynda qaıta qalpyna keltirilgen qala ákimdiginiń ǵımaratyn aralap kórdi - dep habarlaıdy Aqordanyń baspasóz qyzmeti.
Qasym-Jomart Toqaevqa rekonstrýktsııa kezinde ákimdik ǵımaratynyń energetıkalyq tıimdiligin edáýir arttyrýǵa yqpal etken zamanaýı materıaldar men tehnologııalar qoldanylǵany týraly baıandaldy. Ǵımarattyń tarıhı mánin eskere otyryp, onyń arhıtektýralyq kelbetin saqtaý týraly sheshim qabyldandy. Mármárli qasbetter, jezben jáne tabıǵı tastarmen bezendirilgen ishki sándik elementter burynǵy qalpyna keltirildi.
Rekonstrýktsııa jumystary tolyǵymen aıaqtalǵan úsh pavılonǵa byltyr qazan aıynan bastap qala ákimdiginiń apparaty men 14 basqarmasy ornalasty.
Prezıdentke órtten qatty zardap shekken №4 pavılonda jóndeý jumystary jalǵasyp jatqany týraly málimet berildi. Kúmbezdi ustap turatyn qondyrǵylar men temir konstrýktsııa joǵary temperatýranyń áserinen túgeldeı zaqymdanǵan. Sondyqtan kúmbezdi tolyqtaı qaıta jóndeýge týra keldi. Qazir burynǵysyna qaraǵanda áldeqaıda jeńil, jańa konstrýktsııa ornatylǵan. Qurylys jumystaryn aqpan aıynyń sońyna deıin aıaqtaý josparlanyp otyr.
