Prezıdent Almaty áýejaıynyń jańa halyqaralyq termınalyn aralady
ALMATY. KAZINFORM — Prezıdent Qasym-Jomart Toqaevtyń Almatyǵa jumys sapary qala áýejaıynyń jańa halyqaralyq termınalyn aralap kórýden bastaldy.
Memleket basshysyna termınaldyń ashylýy qarsańynda qurylystyń qalaı júrgizilgeni jóninde baıandalyp, jolaýshylardy tirkeý, shekara jáne kedendik baqylaý aımaqtary, júk bólimi tanystyryldy.
«Almaty halyqaralyq áýejaıy» AQ prezıdenti Alp Er Týnga Ersoı seısmıkalyq jáne órt qaýipsizdigi talaptaryn saqtaı otyryp salynǵan termınal magnıtýdasy 10 balǵa deıingi jer silkinisine tótep bere alatynyn aıtty.
Ǵımarattyń jalpy aýdany — 53,5 myń sharshy metr, jylyna 14 mıllıon jolaýshyǵa qyzmet kórsete alady.
Jańa termınal Ortalyq Azııada birinshi bolyp Excellence in Design for Greater Efficiencies (EDGE) baǵdarlamasy boıynsha sertıfıkat alady.
Jolaýshylar men avıakompanııalar sanynyń ósýin eskere otyryp, 50 tirkeý baǵany jumys isteıtin bolady. Ol úshin jańa jabdyqtar satyp alynǵan. Termınalda múmkindigi shekteýli adamdar úshin tolyqtaı jaǵdaı jasalǵan.
Budan keıin Prezıdent áýejaıdyń jańa VIP-termınalyn aralap kórdi.
Memleket basshysy qala jáne el týraly alǵashqy áser áýejaıdan qalyptasatynyn atap ótti.
— Almaty halyqaralyq áýejaıy — elimizdegi eń iri áýe aılaǵy. Ońtústik astanamyzdy tamashalaıtyn týrıster sany jyl saıyn artyp keledi. Byltyr qalaǵa 2 mıllıonnan astam týrıst kelip-ketken. Osydan eki jyl buryn qurylys ornyna kapsýla salý rásimine qatysyp edim. Al erteń, mine, Almaty halyqaralyq áýejaıynyń jańa termınaly alǵashqy reısterge qyzmet kórsetpek, — dedi Qasym-Jomart Toqaev.
Prezıdent termınal qurylysyn halyqaralyq standarttarǵa saı júrgizgeni úshin TAV GROUP kompanııasyna, sondaı-aq Almaty úshin osyndaı mańyzdy jobaǵa atsalysqan kredıtorlar kontsortsıýmy — Eýropalyq qaıta qurý jáne damý bankine, Halyqaralyq qarjy korporatsııasyna jáne Eýrazııalyq damý bankine alǵys aıtty.
