Prezıdent Almatynyń joǵarǵy bóliginde kóppáterli turǵyn úı salýǵa moratorıı engizýdi tapsyrdy

ALMATY. KAZINFORM — Memleket basshysy Almaty qalasynyń ákimi Darhan Satybaldyny qabyldady. Bul týraly Aqorda málim etti.

Darhan Satybaldy shahardyń áleýmettik-ekonomıkalyq damý qorytyndylary men aldaǵy josparlary týraly baıandady. 

Qala ákiminiń aıtýynsha, bıylǵy birinshi jartyjyldyqta qysqamerzimdi ekonomıkalyq ındıkator 11 paıyzǵa ósken. Negizgi kapıtalǵa salynǵan ınvestıtsııa kólemi 25,4 paıyzǵa artqan. 

Qalanyń ortalyq bóligine túsetin júktemeni azaıtýǵa, ınfraqurylymdy teńgerimdi bólýge jáne qalada jaıly orta qalyptastyrýǵa baǵyttalǵan polıtsentrıstik damý barysy jóninde málimet berdi. Aýdandar arasyndaǵy tıimdi baılanys pen qoǵamdyq kólik qyzmetin jaqsartatyn transport júıesin qurý máselesine erekshe nazar aýdaryldy. 

Qasym-Jomart Toqaev qala ákimine shahardyń joǵarǵy bóliginde kóppáterli turǵyn úıler salýǵa jáne aýmaqty taryltatyn qurylys júrgizýge moratorıı engizýdi tapsyrdy. 

Bul shekteý Bas josparda qarastyrylǵan áleýmettik nysandar men týrıstik klaster jobalaryna qatysty emes. Bas josparǵa tabıǵı ortany qorǵaýdy kúsheıtýge, qalany júıeli damytýǵa jáne taý bókterindegi qurylystyń aldyn alýǵa arnalǵan ózgeristerdi ýaqyt ozdyrmaı engizý mindetin júktedi.

Buǵan deıin habarlanǵandaı, Prezıdent pen Antonıý Gýterrısh Almaty qalasyndaǵy BUU óńirlik ortalyǵynda sóz sóıledi.