Prezıdent: Almaty aglomeratsııasyn damytý qajet
QONAEV. KAZINFORM — Memleket basshysy Alataý qalasynyń Almatyǵa irgeles ornalasýy zor múmkindikterge jol ashatynyn aıtty. Bul týraly Aqorda málim etti.
— Ásirese, saýda-ekonomıka jáne kólik-logıstıka salasyndaǵy baılanystardy edáýir keńeıtýge bolady. Muny aımaqtaǵy bılik ókilderi de, kásipkerler de jaqsy túsinýge tıis dep sanaımyn. Sondyqtan taǵy da atap ótkim keledi: Alataý qalasynda, eń aldymen, bıznes júrgizýge qolaıly jaǵdaı jasaý kerek. Jańa kásiporyndar ashylsa, munda jurt ta kóbirek kelip, turaqtaı bastaıdy. Bul úrdis Almatyǵa jumys babymen kúndelikti kelip-ketetin halyqtyń sanyn azaıtady. Kún saıyn Almatyǵa oblystan 400 myńǵa jýyq avtokólik kirip shyǵady. Almaty aglomeratsııasyndaǵy kólik qatynasyn kúsheıtý qajet. Sonyń ishinde jyldamdyǵy joǵary qoǵamdyq kólik júıesin belsendi damytý kerek. Osyǵan oraı, Almaty qalasynyń jáne Almaty oblysynyń ákimderine «Samuryq-Qazyna» qorymen birlesip, bıyl birinshi tamyzǵa deıin «Skytrain» jelisin salý máselesin pysyqtaýdy tapsyramyn, — dedi Prezıdent.
Memleket basshysynyń aıtýynsha, bul jeli qalanyń shekarasynan shyǵysqa jáne batysqa qaraı tartylýǵa tıis. Sondaı-aq Alataý men Almaty qalalaryn jalǵaıtyn júrdek qoǵamdyq kólik júıesin damytý máselesin pysyqtaý qajet.
— Jańa shahardyń Úlken Almaty aınalma avtokólik jolynyń boıynda ornalasýy jáne Alataý qalasyn Qorǵaspen qosatyn temir jol tarmaǵynyń josparlanýy keleshekte Almaty aglomeratsııasynyń aýqymyn keńeıte túsedi. ıAǵnı aýqymdy oblystyq klaster paıda bolady. «Almaty SkyHub» zamanaýı mýltımodaldi logıstıka ortalyǵy óńirdegi mańyzdy jobalardyń biri bolmaq. Osy órshil jobalardy júzege asyrý úshin barlyq qajetti jaǵdaıdy jasap, ınvestorlardy belsendi túrde tartý kerek. Qazirdiń ózinde saýda-logıstıka ortalyǵyn jáne qoıma ınfraqurylymyn damytýǵa qyzyǵýshylyq tanytyp otyrǵan áleýetti seriktesterdiń, sonyń ishinde shetel kompanııalarynyń bar ekenin bilemin. Atalǵan múmkindikterdi barynsha paıdalaný qajet, — dedi Prezıdent.
Buǵan deıin Memleket basshysy Qasym-Jomart Toqaev elimizde ınvestıtsııalyq jobalardy iske asyrý úshin jer telimderin paıdalanýdyń aıryqsha sharttary ázirlengenin aıtty.
