Prezıdent alkogoldik ónimniń kóleńkeli naryǵyn synǵa aldy

ASTANA. QazAqparat - Búgin Úkimettiń keńeıtilgen májilisinde Prezıdent Nursultan Nazarbaev alkogoldik ónimniń kóleńkeli aınalymymen kúresti synǵa aldy, dep habarlaıdy QazAqparat.

«Keshe Baqyt Sultanovqa (Qarjy mınıstri) aıtqan bolatynmyn, araq-sharap isinde júrgen adamdardyń 70-80 paıyzy salyqtyń janynan jylystap ketip jatyr. Túnde shyǵarady, ıaǵnı resmı qujattarda eskerilmegen qolma-qol aqsha júrip jatyr, aınalymda qomaqty qarjy  bar. Olar sheneýnikterdi búldiredi. Nátıjesinde, qarjy bıýdjetti aınalyp ketýde. Bul máselede tıisti tapsyrma bermeıinshe, eshkim de qozǵalmady. Salyqshylarymyz qaıda? Osy saladaǵy adamdar qaıda? Osylaı jumys isteýge bola ma? Kóz aldaryńda, osyny kórip otyrsyńdar, joǵary jaqtan toqpaq kerek», - dedi Memleket basshysy.

Osy oraıda Prezıdent árbir mınıstrge, ár óńirge qajetti quqyq berilgenin, óz erkimen jumys isteýge jaǵdaı jasalǵanyn atap ótti.

«Sonyń ózinde joǵary jaqtan tapsyrma bergende ǵana qozǵalasyńdar. Bul keleńsizdikterge qashan núkte qoıylady? Qyzmette júrgenderdiń negizgi bóligi jas býyn ǵoı. Álde, quramdy taǵy da jasartý kerek pe?», - dedi Memleket basshysy.