Prezıdent Álıhan Smaıylovqa memlekettik aýdıt júıesin jetildirýge qatysty tapsyrma berdi
ASTANA.KAZINFORM - Prezıdent Qasym-Jomart Toqaev Joǵary aýdıtorlyq palata tóraǵasy Álıhan Smaıylovty qabyldady. Bul týraly Aqorda habarlady.
Memleket basshysy Joǵary aýdıtorlyq palatanyń bıylǵy alǵashqy jartyjyldyqta atqarǵan jumysynyń qorytyndysy týraly esepti tyńdady. Álıhan Smaıylov atalǵan kezeńde somasy 5,8 trıllıon teńgeni quraıtyn 13 iri memlekettik aýdıt júrgizilgenin aıtty.
Tekserý jumystary jekelegen óńirlerdiń jergilikti atqarýshy organdaryn, «Problemalyq kredıtter qory», «Agrarlyq korporatsııa», «Qazposhta», «Aqtaý teńiz porty» aktsıonerlik qoǵamdaryn, densaýlyq saqtaý júıesiniń ınfraqurylymy men birqatar memlekettik organdardy qamtydy.
Anyqtalǵan kemshilikterdi joıý nátıjesinde memleket bıýdjetine 128 mıllıard teńge qaıtarylǵany jóninde baıandady.
Úkimet pen aýdıt nysandaryna 35 usynym men 413 nusqama jiberildi.
Memleket basshysynyń bıýdjet úderisin jetildirý jónindegi tapsyrmasyn oryndaý aıasynda ulttyq zańnamaǵa Joǵary aýdıtorlyq palatanyń bastamasymen birqatar ózgeris engizildi. Atap aıtqanda, makroekonomıkalyq boljam qalyptastyrýdyń jańa erejesi qabyldanyp, memleket qarajatyn jumsaýǵa qatysty qazynalyq baqylaý kúsheıtildi jáne tórtinshi toqsanda bıýdjetke túzetý engizýge tyıym salyndy.
Jekeshelendirý úderisiniń ashyqtyǵy men tıimdiligin arttyrý sharalary, sondaı-aq agroónerkásip keshenin retteý tetigin jetildirý jóninde málimet berdi.
Bıyl ekinshi jartyjyldyqta 20 memlekettik aýdıtti aıaqtaý josparlanǵanyn jetkizdi. Onyń tórteýi Memleket basshysynyń tikeleı tapsyrmasy boıynsha qolǵa alynǵan. Shymkent qalasyna, Qaraǵandy jáne Shyǵys Qazaqstan oblystaryna, sondaı-aq farmatsevtıkalyq ónim óndirýshilerdi qoldaý tetikterine tekserý júrgiziledi. Sondaı-aq gaz ben ınvestıtsııa salalary, «Jasyl damý» AQ, «QazAvtoJol» UK» AQ qyzmeti, jekelegen ulttyq jobalar, «Aýyl – el besigi» jobasy jáne basqa da baǵyttar tekserýden ótpek.
Jańa Quryltaımen ózara is-qımyl aıasynda 2027-2029 jyldarǵa arnalǵan respýblıkalyq bıýdjet jobasy baǵalanatyn bolady.
Prezıdent zamanaýı tsıfrlyq sheshimder men jasandy ıntellekt tehnologııalaryn engizýge basymdyq bere otyryp, memlekettik aýdıt júıesin jetildirý jóninde birqatar tapsyrma júktedi.
