Prezıdent: Alǵys aıtý kúni – azamattarymyzdyń bir-birine degen qurmetiniń sımvoly
ASTANA. KAZINFORM – Memleket basshysy Qasym-Jomart Toqaev Qazaqstan halqyn Alǵys aıtý kúnimen quttyqtady. Bul týraly Aqordanyń baspasóz qyzmeti habarlady.
Qurmetti otandastar!
Barshańyzdy Alǵys aıtý kúnimen shyn júrekten quttyqtaımyn!
Bul jarqyn mereke azamattarymyzdyń bir-birine degen rızashylyǵy men tilektestiginiń, shynaıy qurmetiniń sımvoly sanalady.
Halqymyz ǵasyrlar boıy berekeli birligi men týǵan jerge degen sheksiz súıispenshiliginiń arqasynda eń kúrdeli synaqtar men qaterlerdi eńsere bildi. Osy irgeli qundylyqtar jalpyulttyq biregeıligimizdiń ajyramas bóligine aınaldy.
Bıyl Qazaqstan halqy Assambleıasynyń qurylǵanyna 30 jyl tolady. Bul qurylym qoǵamdaǵy ózara túsinistik pen kelisimdi nyǵaıtýǵa ólsheýsiz úles qosyp keledi.
Qazir bizdiń aldymyzda júıeli ári aýqymdy reformalardy júzege asyrý mindeti tur. Osy oraıda, ár azamattyń el taǵdyryna jaýapty ekenin tolyq sezine bilýi mańyzdy.
Biz judyryqtaı jumyla bilsek qana, úılesimdi jáne ádiletti qoǵam qurý jolynda jetistikke jetemiz.
Týǵan eldiń ıgiligi úshin adal ári tynymsyz eńbek etip júrgen barsha otandastaryma alǵys aıtamyn.
Sizderge zor densaýlyq, baq-bereke tileımin! - delingen quttyqtaý mátininde.
Memleket basshysy Qazaqstan halqyn Ramazan aıynyń bastalýymen quttyqtaǵan bolatyn.