Prezıdent: Alǵashqy saparymnyń Ózbekstandaǵy Qazaqstan jylynyń ashylýyna tuspa-tus kelýiniń sımvoldyq máni bar
TAShKENT. ÓzA-QazAqparat - Alǵashqy memlekettik saparymnyń Ózbekstandaǵy Qazaqstan jylynyń ashylýymen tuspa-tus kelýiniń sımvoldyq máni bar. Ózbekstannyń «ÓzA» ulttyq aqparat agenttigine suhbat bergen QR Prezıdenti Qasym-Jomart Toqaev osylaı aıtty, dep habarlaıdy QazAqparat.
"Osynaý ataýly oqıǵany ótkizý týraly sheshim ekijaqty qarym-qatynas jylnamasynyń jarqyn betine aınaldy. Qazaqstandaǵy Ózbekstan jyly óte joǵary deńgeıde ótti. Bizdiń elimizde ǵylym, mádenıet, bilim adamdary, mekemeleri, kásipkerlik qurylymdar arasyndaǵy baılanystardy keńeıtýge jáne nyǵaıtýǵa septigin tıgizgen 200-den astam is-shara uıymdastyryldy. Birinshi qazaqstandyq-ózbekstandyq óńiraralyq yntymaqtastyq forýmy tabysty ótkizildi. Onyń qorytyndysynda eki eldiń baılanystaryn odan ary damytýdy kózdeıtin mańyzdy qujattarǵa qol qoıyldy", -dedi QR Prezıdenti.
Osy oraıda Qasym-Jomart Toqaev mundaı formattaǵy yntymaqtastyq shekaralas oblystardyń ózara is-qımylynyń artýynda mańyzdy faktorǵa aınalyp, bıznestiń eki eldiń naryǵyna shyǵýyn jedeldetetindigin, ekijaqty saýdany aıtarlyqtaı jandandyrýǵa múmkindik beretindigin basa aıtty.
«Máselen, ótken jyly elderimiz arasyndaǵy taýar aınalymy shamamen 50 paıyzǵa ulǵaıyp, 3 mlrd dollardy qurady. Eki memlekettiń bir-birine jaqyndaı túsýin halyq zor jigerlene qabyldap otyrǵandyǵyn basa aıtqym keledi. Sondyqtan baýyrlas elge meniń alǵashqy memlekettik saparymnyń Ózbekstandaǵy Qazaqstan jylynyń ashylýymen tuspa-tus kelýiniń sımvoldyq máni bar", - dedi Memleket basshysy.
