Prezıdent áleýmettik jelide tilge qatysty ultarazdyqty qozdyratynyn arandatýshylar bar ekenin aıtty
ASTANA. KAZINFORM — Qazaq tilinde bir aýyz sóz aıta almaý bilimsizdiktiń belgisine aınaldy. Bul týraly Qazaqstan Halyq Keńesiniń birinshi sessııasynda Memleket basshysy Qasym-Jomart Toqaev aıtty.
— Osyǵan deıin birneshe márte aıtqanmyn: ultty uıystyryp, memleketimizdiń irgesin bekemdeıtin eń mańyzdy faktor — memlekettik til. Buryn boljammen, dolbarmen ǵana aıtylatyn jaǵdaı qazir shyndyqqa aınaldy. Qazaq tili qandaı da bir ákimshilik, tipti saıası májbúrleýsiz órisi keńeıip, kópshiliktiń tiline aınaldy. Ásirese, jastarymyzdyń qazaq tilinde erkin, saýatty sóıleıtini qýantady. Ana tilimiz memlekettik til retinde suranysqa ıe, ulttyq mádenıetimizdi, bolmysymyzdy shyraıly da shuraıly týǵan tilimiz arqyly kórsetemiz. Qazaq tilinde bir aýyz sóz aıta almaý bilimsizdiktiń belgisine aınaldy, — dedi Prezıdent.
Memleket basshysynyń paıymynysha, munyń bári — toleranttyq pen senimge negizdelgen ortaq jumystyń nátıjesi.
— Alaıda bul basqa tilderden bas tartý kerek degendi bildirmeıdi, ári olardy shettetýge quqyq bermeıdi. Ózderińizge málim, Konstıtýtsııada tiline, tegine, ultyna, dinı kózqarasy men nanymyna nemese kez kelgen ózge de sebepterge baılanysty kemsitýge tyıym salynǵan. Soǵan qaramastan ara-tura keıbir tisqaqqan arandatýshylar áleýmettik jelide ultarazdyqty qozdyryp, ádeıi otqa maı quıady. Myna nárseni túsingen jón. Olardyń kózdegeni bireý — qoǵamdy álsiretip, Qazaqstannyń Egemendigine nuqsan keltirý, eldi birlikten aıyryp, beıbit, alańsyz ómirimizdiń astań-kesteńin shyǵarý. Rasynda olar balalarymyz ben nemerelerimizdiń baqytty bolashaǵynyń tamyryna balta shapqysy keledi. Sondyqtan quqyq qorǵaý organdary men tutas qoǵam buǵan tabandy túrde qarsy turýy kerek. Konstıtýtsııada bekitilgen «Zań men tártip» qaǵıdatyna saı áreket etýimiz qajet, — dedi Qasym-Jomart Toqaev.
Aıta keteıik, jıyn barysynda Prezıdent Konstıtýtsııa ár adamnyń qolynda júretin, jumys ústelinde turatyn qujat bolýǵa tıis ekenin aıtty.
